Iban, Sarawak News - Saturday, May 17, 2008 10:00 - 0 Comments

Tangkan hari jai di utara Sarawak

Kudi enggau ujan bangat dipelaba deka mangka berunggul empat hari

MIRI: Mensia mayuh di sekayu menua utara Sarawak dipinta nyendia diri betangkup enggau kabut kudi biau balai sereta enggau ujan bangat dalam kandang timpuh empat hari berengkah ari diatu.

Kabut enggau ujan nya disadang mangka sereta ninggang mensia mayuh ngenataika penanggul ditu laban iya gembar puput angin kuat ari Selatan Pilipin enggau taipun entara menua Indochina enggau Pilipin.

Hari ke jai terubah iya dipelaba nyadi sampai ngagai hari Enam (seharitu) tang nitihka gaya hari ke diperati Opis Ngemata Gaya Hari ngayanka iya agi mengkang bakanya ngagai pun minggu dudi tu ila.

Sapit Kepala Menteri ke mega chermin komiti bantu tasah Menua Datuk Patinggi Dr George Chan Hong Nam mantai pekara tu ba siti aum berita udah bekau ke diberi lansa pemadah pengari ari Opis Ngemata Gaya Hari JC Sim, pengari ari polis, Rela, Opis Welfare ba Opis Residen Miri.

Dalam atur nya, iya disempulang Menteri Muda Pemansang Infrastruktur enggau Komunikasi Lee Kim Shin enggau pengari rayat KN Pujut Andy Chia.

“Ribut kudi enggau ujan disadang mansang tunga pun tekan angin baruh di Selatan Pilipin entudi penyadi Taipun Ramusan ke udah badu ngudi menua.

“Angin entara pengelaju 30 ngagai 50 km sejam dipelaba nyadi lalu pia mega umbak entara 2.5 ngagai 3.5 meter dipelaba nyadi dalam empat hari udah tu ila, lalu tau ngenusahka bala orang berikan,” ku iya sereta ngarapka gaya hari nya enda majak jai.

Menteri nya ngenang pasal pengerusak menua beduduk ari sipat iku Taipun Ramusan ke bisi mangka menua Miri sereta ngemai pengerusak ngagai kira bisi 200 buah rumah minggu tu tadi. Bisi 58 iku bala mayuh ari 11 ruang bilik seranta udah ditaga nerima bantu ari Opis Welfare.

Pengabis laju angin kabut kudi nya 19 meter sesikin, iya nya lebuh maya ribut ti kuat ngembar ujan bangat ngujungka sekeda atap perabung rumah abis tebabak, tetumbangka pun kayu ke bisi tebabut enggau urat-urat. Semua pekara nya balat ngasuh mensia mayuh irau bendar ati, lalu sedia nangkup enggau bisi penanggul ti besai agi ninggang sida.

Dr Chan madah udah bisi ngasuh Residen Miri Ose Murang ngagih bantu ari pan tasah kena meri bantu ngagai bala sida ke tasah nya, baka kena meli sekeda ramu enggau perengka rumah ke bukai enggau lengkas.

Siti aum ke diatur residen nya demalam ngambika alai ninga ripot pasal semua insiden ka tambah atur nyendia diri dalam dua tiga hari dudi tu.

“Mensia mayuh nadai ulih nganti opis Welfare meri bantu ke dipinta sida laban pekara ngemendar bantu nya deka beguna ka jam ti lama nganti dikemendar. Nya alai pan bantu beguai nya jampati agi datai mantu bala sida ke tasah nya begaga ka atap enggau dinding sida sereta ngaga utai bukai,” ku iya.

Bantu ari opis welfare nya ngagai bala sida ke seranta nya deka diagih udah bekau nya ila.

Siti raban mantu beguai deka ditumbuh kena berumban mantu dalam pengawa ke beguai ku Dr Chan sereta madah penanggul dalam atur ngempung komiti bantu beguai sitak menua sereta komiti pengempung patut semua disungkakka pemanah iya lalu dibuai ketisi pengurang iya.

“Kitai udah bisi pun unit tu tang kitai enda tau enda enggau naka ulih ngeringka iya ari diatu nambah iya enggau siti unit ulih berumban datai mantu beguai,” ku iya lebuh ngenang pasal bisi sekeda orang ke madah nadai raban tauka kuasa ke ulih nentuka orang ngesah pengawa nya datai jampat mantu sida ke abis terebai atap perabung tegal penguat kabut ke mangka nya.

NGO ku iya, tau mega ngenataika bantu maya orang kena tnggang penanggul ke bakanya.