KUCHING: Pasaraya tHe Spring Shopping Mall ditu ngintu Gawai Dayak ari kemari datai ngagai tengan bulan Jun tu ila enggau mayuh macham program sereta begayaka fesyen kemaya hari tu.

Ba North Court pasaraya nyadi rumah panjai Dayak ke mit ke mega bisi mandangka mayuh barang fesyen ti di kena komuniti Dayak, besemak enggau alai bala indu mandangka fesyen ba “Bidayuh-themed catwalk”.

Program nya belabuh enggau “fashion show”, ke ngayanka sida ke enggau bepekit ba Miss Sarawak Top Model of the World enggau Miss Sarawak Model of the World.

Presiden Parti Rakyat Sarawak Dato Sri James Jemut Masing Muka, nyadi temuai ke dibasa muka pengerami nya ke deka bejalai pengelama sebulan berengkah kemari.

“Asai aku, tu meh pengerami keterubah iya nyambut Gawai Dayak ke kala diatur ba pasaraya ke besai baka tu,” ku Masing. “Aku meri besai terima kasih ngagai opis pasaraya tu ke udah bejadi pengawa ke enda ngira bansa ke ba menua kitai ditu, tu mandangka rayat kitai ba menua tu ulih berakup enggau pangan diri.”

Masing ke mega Menteri Pemansang Tanah madah, ngemesaika tiap pengerami ba menua tu nandaka opis pasaraya nya bisi tanggungjawab sosial korporat.

“The Spring udah ngangkatka tiap iku orang mayuh ba Sarawak tu. Tu tanggungjawab sosial korporat, ti dikarapka aku deka mega disambut lebuh orang mayuh nyambut Taun Baru Cina, Hari Raya enggau Hari Krismas,” ku iya.

Kelimpah ari nya, “fashion show” ba pasaraya nya bisi nyengkaum sida ke enggau ba program nya baka kedai My Diamond, K-2, 9months, Body Glove, Carlo Rino enggau Nicole.

“Fashion show” tu deka di pandangka entara 16 Mei ngagai 18 Mei tu. Orang mayuh ke deka ngambi peluang begambar ba pengerami tu ba pasaraya tu, tau ngambi peluang ngagai pasaraya tu laban mayuh macham program udah di atur enggau mayuh macham barang di jual mega,” ku sida ari opis pasaraya tu madah nengah surat ari pasaraya tu.

Enti deka nemu enggau silik agi, tau talipaun ngagai Events and Promotion Department ba talipaun 082-238111 tauka 016-8799092.