Semua patut sama ngena kuasa karan enggau chukup penyimat

BINTULU: Penemu nitihka prosedur pengelikun besai amat reti ukai semina ungkup orang dalam pengawa ke besangkut paut, tang mega patut ditunda semua dalam pengidup besari-sari.

Kepala Pemesai Operasi Kompeni Sesco Berhad Danice Endawie Ita, madah isu pengelikun ukai pekara baru, lalu patut dikingatka belama ukai semina staf Sesco tang semua orang patut nemu pemesai reti nyaga pengelikun.

Iya madah, ungkup bala orang dalam kompen Sesco, sida patut enggau naka ulih nentuka alai sida gawa semampai likun.

“Ari nya prosedur gawa patut ditunda enggau naka pemanah ngambika nadai penusah nyadi. Tebal agi utai ke enda manah nyadi tegal kitai enda bejimat lalu enda chukup berati,” ku Endawi lebuh bejaku bejadi pemuka Minggu Pengelikun ke ngena rambai jaku ‘Pengelikun Tanggungjawab Semua’, ke diatur Kompeni Sesco Berhad Bintulu pagi kemari.

“Tuju kitai ngurangka sereta terus munaska eksiden ba alai kereja,” ku iya sereta ngarapka staf Sesco sama nyaup ngajar bala mayuh ke nadai awak nemu pasal pekara tu kelebih agi ke besangkut paut enggau bekal kuasa karan.

Kelimpah ari nya, Menijar Kandang Menua Kompeni Sesco Berhad Bintulu Charles Ha How Ching madah, staf Sesco patut betemu enggau mensia mayuh ngajar sida pasal pemesai guna ngiri mensia mayuh enggau pemereti ati kena ngurangka penusah baka angus parai tauka eksiden kena tangkap karan.

Tegal nya ku iya, beserimbai Minggu Pengelikun bala sida deka ngatur mayuh pengawa kena nyungkak pemereti ati bala mayuh pasal pengelikun, ke alai bala staf Sesco deka ngatur penemuai ngagai Shell MDS minggu dudi tu, ditangkan enggau siti program berandau ba sebuah rumah panjai di Sungai Asap sereta meri lansa pemadah mimit ngagai bala sida pasal pengelikun diri enggau sida sebilik.

Endawi madah, sida amat ngemeranka pengelikun kelebih agi ngagai bala mayuh laban pengelikun nya tanggung pengawa semua.

“Kitai enda tau enda berunding pasal pengelikun sereta bekereja enggau naka penyimat, nya alai kerembai pemadah tu ngagai renggat baruh amat besai guna kena ngurangka risiko eksiden,” ku iya ngarapka sekeda mensia mayuh nyadi ‘mata enggau pending’ Sesco enti bisi meda orang enchuri reta tengkira Sesco, lalu ngarapka kita terus ngeripot ngagai opis kami tauka ngagai polis,” ku iya.