Aum Adat Iban singkang positif nurunka penemu ngagai rebak baru

KUCHING: Aum Adat Iban ke diatur Yayasan Tun Jugah begulai enggau Majlis Adat Istiadat Sarawak, diterima enggau ati ke ransing deka bejuraika penemu pasal adat Iban.

Bisi sekeda sida iya meri penemu pasal aum adat Iban tu ke berengkah sehari kemari enggau hari ke penudi iya sehari tu.

Temenggong Wilson Atong anak Limping, 50an, ari Rumah Boniface Bada, Suai Miri Ngarika pelilih Bintulu, Miri enggau Limbang madahka aum tu chukup manah.

“Aum tu tau mai pengeransing ati ngagai kitai Iban kelebih agi ngagai tuai-tuai Iban ke udah datai kitu besaup penemu ba Aum Adat Pendiau Iban. Mayuh tukuh kitai Iban ke nyadi pencheramah, tuai ke bisi penemu pasal adat Iban, penatai enggau penti pemali kitai Iban.

“Tu siti penguntung kitai ke dikingat anak uchu kitai dudi hari ila, ke kiruh bejuraika penemu tu. Bisi 50 ngagai 60 peratus tuai kitai Iban bisi ngarika pelilih ai siti-siti. Semua sida ke ditu bisi penemu ke manah, lalu ari pendiau baka tu ke begulu ke dikangauka Datuk Amar, tu siti peransang kitai Iban, awakka kitai ulih begempung besukung lalu bejuraika pekara tu, ngajar kitai bekaul, belajar enggau bisi penguntung ba dagang dudi hari ila begulai enggau pangan diri tauka bansa bukai dalam menua tu,” ku iya.

Kelimpah ari nya, Wilson madahka aum tu mega ngajar sida iya besemekih idup, bisi penemu ba adat, bisi runding ke panjai lalu ulih ngemansangka bansa Dayak dudi hari ila.

“Nya alai, sepi aku, patut diintu tuai-tuai kitai kelebih agi tuai raban bansa bela ngatur pendiau kitai. Kitai mega ulih ngetanka adat enggau bansa kitai Iban.

“Setengah hari tu tadi, kami bejuraika pendiau kitai Iban baka berumah, belaki bebini,ke besai endar reti, bejuraika penemu lalu enggau nya tuai rumah enda tau enda madahka reti nya ngagai orang mayuh nitihka adat kitai, betampung ke enda enggau diri sebilik ti ulih ngintu bilik kitai empu ba rumah panjai. Ba aku sigi bisi atur berumah, baka kitai Iban patut ngatur rumah enggau manah sereta lurus. Bansa bukai bebasaka kitai lalu kitai pan bebasa kitai empu,” ku iya.

Ba penemu Wilson mega, adat Iban tu mega patut dikerembaika ngagai sida ke biak. Iya madah, mayuh bala nembiak diatu enda nemu pasal adat Iban laban nadai orang madah enggau chukup silik enggau terang ngagai sida tu.

Ku iya, maya Gawai tu meh maya iya sida ba rumah panjai patut bekenang pasal adat laban mayuh nembiak diatu diau ba nengeri. Nyadi sida semina pulai setaun sekali.

Iya madah: “Enti pengawa ngingatka pekara tu enda diadu, sida nembiak tu deka ngasaika pendiau sida iya jauh ari adat, ke tau ngujungka sida madahka diri nadai bansa agi,” ku iya ke ngaku mega runding sida ke biak patut didinga mega.

Pengulu Batu Surek, 65 taun, ari Rumah Serubah Ili, Lemanak, Engkili ngarika ai pelilih Batang Ai enggau Lubuk Antu.

Pengulu Batu madah aum adat Iban tu manah bendar, laban iya ngemetulka adat sekeda ke agi bisi tinggal.

Iya madah: “Baka pengawa berumah bisi lain mimit ari menua siti ngagai menua siti, nyadi maya aum tu kami bejuraika runding kami tu mantaika penemu kami ba pengawa adat berumah,” ku iya.

Iya nambah, amat mayuh komuniti Iban diatu udah nyadi Kristian, tang iya madah adat Iban enda tau dibuai baka nya aja enggaika jemah ila nadai kena bala nembiak bekenangka adat Iban tu.

“Rebak nembiak kemaya hari tu enda entu nemu pasal adat Iban. Nya kebuah ari aum tu ila, deka digaga dalam bup, awakka ulih mulaika pengingat kitai jemah ila. Amat diatu kitai Iban mayuh nyadi Kristian, tang adat anang dibuai sekali. Adat tu tau dikena kitai tiap-tiap hari, kelebih agi sida ke bedau Kristian tauka sida ke diau ba rumah panjai,” ku iya.

Iya nambah, orang kemaya hari tu udah moden enda nemu penti pemali agi.

“Nadai kita kala ninga cherita kelia, bakani ku orang beburung, mendingka jaku petara enggau mayuh macham agi. Ba aum tu Adat Iban ngemetulka adat ke bisi tinggal. Tu tau pulai ke pemanah kitai, bala anak enggau uchu kitai. Manah ga enti bisi orang deka muka kelas pasal pelajar adat Iban, nembiak diatu pan tau belajar bansa diri empu, enda nyau bansa kitai ila. Enti enda belajar, kitai enda nemu adat bansa kitai,” ku iya.

Pengulu Jampi Rawing, 68 taun, ari Nanga Entawa, Kapit ngarika pelilih Batang Rajang madah aum tu manah ke iya laban tu siti ari aum ti deka ngerembaika adat.

“Ngambi ke pengingat dudi hari ila. Enti ulih minta aum tu sekali agi diatur baru iya nyentuk amat,” ku iya ke besetuju pengawa tu ila enti udah dichelak ba bup tau dikingatka bala anak enggau uchu dudi hari ila.

Iya nambah, adat lama enda ulih buai sengapa taja pan mayuh bala kitai Iban diatu udah Kristian

“Pun adat tu datai ari rumah panjai, baka penti pemali. Orang ke biak diatu enda nemu pasal adat laban sida nadai diau ba rumah panjai, nyau gawa ke bukai enti udah skula tinggi, semina nganti maya Gawai baru bisi meda sida iya pulai,” ku iya ke setuju Adat Iban patut dikerembaika agi, lalu nambah enti kitai Iban enda nemu adat kitai empu, bakani ngarap bansa bukai deka nemu pasal adat kitai, ku iya.

Temenggong Matthew Dana, 81 taun, ari Rumah Sungai Pelandok, Paku, Saribas ngarika pelilih Saratok enggau Betong “Aum tu manah, semina aku ngasaika aum tu patut dibagi ngagai tiga tauka empat. Laban ke diatu kelalu mayuh tubuh datai ba aum tu. Enti diatur ba siti bagi ngambi dua tauka tiga bengkah pelilih menua nyentuk agi aum tu,” ku iya ke kala nyadi kaban enam taun ba Majlis Adat Istiadat.

Dana nambah, ba iya adat ba menua Saribas enda sebaka enggau adat ari ai pelilih menua bukai.

“Aku bisi ninga sida ke bukai mantaika penemu sida ba adat, tang adat ari pelilih menua kami enda sebaka enggau orang bukai. Semua adat nya kala dipejuraika kami ba Majlis Adat Istiadat. Baka Adat Berumah ba menua Saribas, enti adat berumah nya belabuh ari nirika rumah datai ngagai angkat ari rumah nya.

“Piring enggau jalai beburung enda sebaka mega. Ba Rimbas lain ba Saratok pan lain. Aku mendingka dulu orang bukai mantaika penemu sida iya, enti bisi awak, baru aku bejaku,” ku iya.