MIRI: Atap sebuah rumah ba Jalai Jee Fah, Krokop ditu abis tebabak pangka kabut kudi ke mega ngejungka sekeda pun kayu abis tebabut sebelah tisi jalai tebing tasik enggau genturung pendiau nya di Miri ditu lemai hari Minggu.

Sekeda bala orang ke sama tinggang penanggul nya bala driba kerita ba jalai tebing tasik nya ke alai kudi enggau ujan bangat ngujungka jalai nya lichin sereta enda ulih meda jauh urung pukul 5 lemai.

Pengari bejaku Opis Bomba enggau Pengidup Nyawa Miri, lebuh ditanya kemari, madah sida semina nerima dua iti ripot ari mensia mayuh pasal pun kayu ke abis tumbang udah bekau tebabut enggau urat-urat iya semak Kampung Piasau Utara, Miri enggau Taman Caltha, Miri pukul 6.48 lemai enggau pukul 9 lemai.

Iya madah bala pengerara api berumban mansang ngagai alai dua iti nya ngupas kayu ke rebah tumbang ninggang jalai.

“Naka kediatu, nadai ripot diterima pasal orang bisi bebadi tauka kena pedis laban kabut ke mangka pengelama sejam setengah,” ku iya madah ngagai Utusan Borneo.

Ngenang rumah ke tebabak atap di Krokop, iya madah nadai nerima ripot ari orang ke tinggang penusah nya.

Ba alai bukai serantu Jalai Lutong-Kuala Baram , Kampung Pulau Melayu, Jalai Miri, Desa Senadin, Tudan enggau serantu jalai besai Pan Borneo, mayuh kayu tumbang.