KUCHING: Sarawak deka ngurangka penyampau orang seranta ari 1.1 peratus ke dirikod ba taun 2004 ngagai kusung peratus taun 2010.

Sapit Kepala Menteri Datuk Patinggi Tan Sri Alfred Jabu Numpang madah, penyampau sekeda orang ke agi idup seranta dipelaba ulih dikurang ngagai 3.75 peratus ba taun 2010 bebanding 7.5 peratus ba taun 2004.

“Perintah Besai enggau Perintah Menua udah mutarka sekeda atur kena ngurangka orang seranta ba menua pesisir enggau chara ngatur projek kena ngangkatka agi pemisi diri sebilik.

“Lalu nyendiaka perengka enggau latih pengelandik, nyendiaka dana kredit mikro nengah agensi ke ngatur lun baka opis betanam Betupi, Lembaga Kemajuan Ikan Malaysia enggau Perbadanan Pembangunan Ekonomi Sarawak,” ku iya.

Iya madah baka nya lebuh nyaut tanya ari Dr Abdul Rahman Junaidi (BN-Pantai Damai) ba sesi tanya saut Aum Dewan Kunsil Nengeri (DUN) ditu, kemari.

Jabu ke mega Menteri Pemansang Menua Pesisir madah, program ke udah di beri kelala Opis Menteri Pemansang Menua Pesisir enggau Menua Tengah ke dikumbai Skim Pembangunan Kesejahteraan Rakyat nyengkaum sekeda komponen baka nambah pemisi, latih pengelandik enggau kereja, pemansang runding, bantu rumah, pemansang orang mayuh ke diau ba sesebengkah endur, sekula anak mit, penambah pemakai ke setipak enggau ASB Sejahtera.

Opis Menteri nya mega, deka ngatur Projek Kesan Tinggi, iya nya Pemansang Agropolitan ke betuju nambah pemisi nengah atur projek bersepadu nyengkaum infrastruktur, ekonomi enggau pemansang mudal mensia.

“Kelimpah ari program tu, Opis Menteri Pengawa Rumah enggau Perintah Menua udah meri kelala insentif kena mantu rayat seranta di nengeri,” ku iya.

Insentif tu baka bantu suwa rumah, bantu masuk institusi pengajian tinggi (IPT) enggau skula; bantu kos nyaga anak mit ngagai taska, tadika, orang sepiak tauka individu, bantu kos ngangkut ngagai endur kereja enggau sekula sereta bantu kos dialisis buah pinggang tauka ulu sengayuh.

Tu mega ngungkup nyendiaka Pusat Sejahtera, peluang kereja, latih pengelandik, palan data sereta bantu pengelantang pendiau.

Ku iya ari aspek Pusat Pertumbuhan Desa (RGC), perintah menua besai udah ngemansangka lima iti koridor pemansang menua tengah ba menua tu nyengkaum Koridor Kuasa Taun Dikena Baru Sarawak (SCORE).

“Enggau penumbuh koridor tu, iya deka ngurangka tikas menua tengah, nengeri enggau menua pesisir.

“Penumbuh SCORE deka ngemansangka penumbuh ekonomi lalu nyendiaka peluang pengawa ngemansangka menua tu kelebih agi ba menua tengah,” ku iya.

Nyaut penambah tanya ari Dr Rahman, Jabu madahka penyeranta ke diasai orang ba nengeri iya ngaku bisi nyadi faktor ngereja penyalah.

“Ba semua menua ba Malaysia tu, penyeranta agi mayuh ba menua pesisir bebanding enggau nengeri.

“Ba Sarawak penyampau orang ke seranta mayuh agi bebanding enggau Semenanjung (Malaysia),” ku iya.