PTBBK gaga ati sereta nyambut enggau manah pengawa bala sida JPJ

KUCHING: Gerempung Teksi Bumiputera Bahagian Kuching (PTBBK) gaga ati enggau pengawa Jabatan Pengangkutan Jalan (JPJ) nagang kerita mai orang mayuh enggau kerita sapu ke nadai permit ari menua sepiak.

Chermin PTBBK Abang Ideris Abang Jemali madah, JPJ empai lama tu tadi bisi ngatur ???Ops Pengarah??? lalu ngetan empat buah kerita empat ruda ari menua sepiak ke bisi mai orang mayuh nyadi pesinjir.

Abang Ideris madah, pengawa nya sigi patut laban sebedau tu ngangkut orang mayuh ba menua tu baka ngena teksi enggau bas, nyengkaum kerita suwa bisi penanggul laban sida ari menua sepiak ke mai pesinjir ngena kerita ke nadai permit.

Iya madah, pengawa JPJ nagang kerita ari menua sepiak berangkut ke orang mayuh ditu nya manah, laban kena ngangkat sereta nyendiaka pengawa ke manah mai orang mayuh di menua tu ulih dikereja kitai ari menua tu empu.

“Kami muji pengawa sida JPJ ke ngatur operasi nagang kerita kena mai orang mayuh ari menua sepiak,” ku iya madah ngagai Utusan Borneo kemari.

Lebuh ke nyebut pasal JPJ ke enggai berkompromi ngagai sebarang kerita sapu ari menua sepiak bejalaika pengawa ke nadai permit, Abang Ideris madah pengawa nya tentu nyamin pengawa sida ba menua tu empu ke bisi mai orang mayuh bejalai enggau mujur.

Iya lalu madah, ba Sarawak bisi 1,500 buah teksi ke ngerijista bejalaika pengawa mai orang mayuh.

Kelimpah ari nya ba Kuching, iya madah lebih 500 buah teksi udah direjista lalu sida ke mai orang mayuh ulih ngereja pengawa nya enggau manah ngagai orang ke diau ditu tauka temuai ari menua luar.

“Kami (empu teksi) suah madahka penanggul kami ngagai sida ke megai kuasa, baka ngatur aum enggau Lembaga Perlesenan Kenderaan Perdagangan (LPKP),” pia ku Abang Ideris ngujungka jaku iya.

Dalam ???Ops Pengarah??? diatur JPJ ba Miri bulan Januari tu tadi, bisi sekeda kerita empat ruda enggau lumur rejista Indonesia, nyadi kerita sapu mai orang mayuh nyadi pasinjir ari Brunei ke Pontianak, Indonesia kena tan.

Iya ke driba enggau ke empu kerita mai orang mayuh ke ditan nya, dibai ngagai court laban kena dawa nitihka Seksyen 33 LPKP lalu sida iya tau kena ukum RM2,000.