KUCHING: Polis nadai nerima sebarang ripot bekait enggau orang ke ka ???meli??? kaban politik ba menua tu. Sapit Kepala Polis Sarawak SAC I Dato Abdul Rahman Hussin madah, enti amat bisi pekara nya nyadi, iya deka nasat nitihka undang-undang.

“Kami nadai nerima sebarang ripot bekait enggau pekara nya, tang enti bisi kami nasat nitihka jalai ke betul,” ku iya madah ngagai sida surat berita, udah bejadika Pengawa Ulang Tahun Polis Ke-201 ditu kemari.

Iya madah, datai ke diatu penanggul disiplin ke bekait enggau raban agi ulih kontrol.

“Kami nadai betunga enggau sebarang disiplin ke serius. Enti bisi pan, semina siti tauka dua kes,” ku iya.

Iya melaba Sarawak deka bulih mayuh agi bantu logistik dalam atur strategik (polis) lima tahun tu.

Iya madah, tuju tu deka muntangka agi pengawa “perondaan” polis kelebih agi ngemeratka pengelikun orang mayuh ulih jamin.

“Enti suba, raban polis bisi kurang bantu logistik, tang diatu ulih ditambah,” ku iya.

Kelimpah ari nya, iya madahka bisi 20 iku raban enggau pemesai IPK deka pinchin tauka udah pinchin deka diberi pengawa baru nitihka pengawa kontrak polis.

“Kami bisi nama sida ke udah setuju lalu udah dianjung ngagai Ibu Pejabat Polis Bukit Aman, tang chara madu pengawa sida tu ari gaji enggau pekara bukai, kami bedau nerima agi ari Ibu Pejabat Polis Bukit Aman,” ku iya.