KAPIT: Polis ditu bisi ngatur randau enggau sida ke bejalaika operasi kayu batang ditu kena nagang pengawa ngereja kayu batang, ku Tuai Polis Pelilh Menua (KPD) Kapit DSP Entusa Iman.

Sesi randau nya ke dipejalai pagi hari Satu ba Indu Opis Polis digulu bisi 19 iku bala tukay tauka pengari ari kem batang sebelah menua Kapit ditu.

Bala pemesai polis ke bisi enggau ba pengerami nya nyengkaum tuai mata gelap ASP Pradeep Sritharan, Inspektor Nazrol Bongsu enggau tuai Special Branch ASP Ritche Jarit.

Entusa madah tu aum keterubah sida enggau bala sida nya sekumbang iya ke udah nyadi tuai polis di Kapit ba ujung taun 2007 suba.

Sesi randau ke dikumbai sida siti atur nagang jenayah nya fokus agi ngagai jenayah reta tengkira baka enchuri sepir enggau komponen injin berat sereta mega ulah enchuri minyak diesel. Semua barang nya sigi mar lalu polis sigi serius dalam pekara nya.

“Polis ke keran nagang jenayah, beguna endar ka kerejasama ari bala kita ke bejalaika operasi kayu, kelebih agi enti bisi pemadah besangkut paut enggau jenayah,” ku iya nerang.

Iya nambah madah, indeks jenayah enchuri komponen enggau barang sepir injin berat enggau jenayah enchuri minyal diesel ke diripot dalam pelilih menua nya tinggi, iya nya 21 kes diripot dalam taun 2006 enggau 19 dalam, 2007. Ngagai 24 Mac, 2008 bisi dua kes udah diripot.

“Nya alai aum tu endang kena minta kerejasama ari bala operator kem kayu batang ngambika berakup enggau polis dalam pengawa nagang pengawa jenayah reta tengkira ba kandang menua ke bisi alai kereja nebang kayu batang dalam pelilih Kapit.

Entusa mega minta bala sida nya anang nejuka reta tengkira sida nadai orang nyaga tauka ngemata, enggai ka penchuri gaga ngena awak nya.

Ka tambah nya, iya minta sida anang ngaji bala rayat datai, iya rayat ke datai ari menua tasik, laban bala raban orang sigi ditemu selalu ngenatai penanggul sosial ba alai sida gawa enggau diau.

“Ka tambah nya, mayuh ari bala sida datai kitu enda beradat, iya nya ngelanggar atur Opis Imigresen,” ku Entusa sereta madah ngagai sida nya sebarang orang ke ditemu ngambi bala sida ke datai enggau nadai kemendar nya gawa, orang sigi salah ngelaban adat baruh Labour Laws.

Iya mega minta bala sida anang enda enggau naka ulih gawa ka polis kena nentuka reta tengkira sida likun belama, ku Entusa ngujungka jaku iya.