SIBU: Bala lutur mantai peminta begulai ngagai perintah Menua enggau perintah Besai ngena dua iti gerempung sida, minta sama berundingka jalai nagang menua ari ampuh bah udah menua Sibu majak ampuh bah.

Peminta ari bala lutur nya sama dibantai serebak enggau resolusi ke sama ari Dewan Dagang enggau Industri China Sibu dalam Aum Besai Genap Taun sida hari Minggu tu tadi.

Sida lutur ari dua iti gerempung nya - Malaysia Medical Association (MMA), pampang Sibu enggau Sibu Society of Private Medical Practitioners (SSPMP) - keran endar minta perintah ngemutarka penanggul ampuh bah enggau lengkas.

Chermin MMA pampang Sibu Dr Hu Chang Hock madah bala lutur menua Sibu sama bela madah sida bala nangi meda ampuh bah ke majak nyadi senyadi dalam Aum Besai Genap Taun sida hari Minggu tu tadi, lalu minta perintah patut balat serius agi nangkup penanggul ampuh bah ditu.

Iya madah, maya nengeri Sibu ke ampuh bah kena 12 Dis taun dulu, bala lutur balat endar tinggang penanggul nyengkaum sekeda ke enda ulih turun gawa muka klinik sida laban ai bah enda ulih tengah.

“Maya nya bala ngenusahka mensia mayuh, nyengkaum bala staf klinik ke enda ulih datai gawa, lalu dalam siti klinik, bala orang ke berubat dia, enda ulih enda dipindah ngagai Sepital Sibu laban enda chukup orang gawa tegal enda ulih nurun laban ai bah.

“Kitai enda patut ngelakka pekara ti sama nyadi baru tauka berulang, nya alai bala lutur mantai penangi sida ba AGM kami hari Minggu, ngarapka perintah ulih meri prioriti ngagai pengawa mutarka penanggul ampuh bah,” ku Dr Hu.

Iya mega madah bala lutur setuju enggau Dewan Dagang enggau Industri China Sibu pekara ti patut diaduka nya ngemansutka pasir enggau tanah ari ai Batang Rajang laban sungai nya majak mabu tegal tanah tusur ke datai ari ulu Batang Rajang nya ngujungjka selalu ampuh bah.

“Dulu suba ampuh bah sekali dalam berapa taun, tang diatu bala mayuh di Sibu sigi tak semampai nyendia diri betangkup sereta ngadang laban ampuh bah,” pia ku iya sereta madah penanggul bah kena 12 Disember 2007 suba terang amat ngayanka penanggul nya endang chukup serius.

“Udah ai bah tus, sekeda nengeri tu agi ampuh tambun luchak ke bisi penebal dua inchi.

“Tu semina bekau ai bah ke kembai nyadi dalam dua tiga hari aja, tang tanah ke tusur anyut ngemenuhka sungai nya nyadi 24 jam sehari,” ku iya.

Lebuh ngenang pasal penanggul ai bah bulan Disember tu tadi, Dr Hu madah sekeda lutur ke benasit, ulih datai ba klinik dalam sejam udah merau kena kerita nengah ai bah ba jalai nya.

“Sida enda ulih enda ngenataika diri ba klinik sida, taja pan nengah jalai ke tusah, laban sida bisi tanggungjawab ke enda tau enda dikenataika, iya nya ngagai orang ke datai berubat,” ku iya.

Hu madah bala lutur dalam gerempung sida, mega bisi mantaika sekeda kes penyakit beduduk ari menua ampuh bah maya 12 Disember taun tu kemari baka pedis perut ( gastroenteritis) renga tauka flu, pedis rekung, sendat idung, batuk, sengak enggau gatal kulit. Sekeda orang ke datai berubat nya laban sida bisi bakal telichir sereta tindikka utai tajam maya ai bah besai.