Opis Kampung Sarawak deka terit agi nyaga pengeraja asal enggau rampa menua

KUCHING: Opis Kampung Sarawak deka terus ngemas serta neritka pengawa bejalaika undang-undang kena nyaga serta ngurangka pengawa enchuri kayu enggau nerubuk kampung simpan.

Menteri Langgur Penemu Kedua, Dato Sri Awang Tengah Ali Hassan madah pengawa bejalaika undang-undang ukai pengawa ke baru, tang udah dijalaika enggau manah ngambika pengawa nya ulih dikurangka.

“Kitai mega mesti bisi pengelandik ngemaska sereta ngemajuka agi chara ngena teknologi tinggi ke baru.

“Pekara tu ulih diaduka berenggat-renggat lalu manah amat enti kitai agi majakka pengawa besaup enggau semua bala,” iya madah bekenya maya sidang media udah bejadi Hari Kampung Sedunya 2008, ditu kemari.

Iya madah, JHS deka ngemajuka agi pengawa ngena Sistem Nginau, Nerit sereta Nagang (MEP) kelimpah ari ngatur baru pengawa nginau ari darat sereta mega nengah langit.

“Chara nginau sereta nyaga baka meda ngena teknologi tinggi sereta baru baka imej satelit enggau Perati Hiperspektral ari langit patut dipajakka agi kelimpah ari ke bejalaika MEP, pia ku padah iya.

Tengah ke mega Menteri Kemudahan Awam madahka pengawa nyaga patut diatur agi ngambika semua agensi baka polis enggau sedadu bejalaika undang-undang kena nyaga serta ngurangka pengawa enchuri kayu ba menua tu.

Nitih ke padah iya, pengawa paling beguna, bala rayat patut betulung ke pangan diri ari meri pemadah ngagai sida ke bisi kuasa enti bisi tepedaka dua bengkah pengawa nya ba menua sida.

“Ukai reti iya pengawa ngereja kayu enda beradat enggau enchuri masuk balat nyadi di Sarawak, tang kitai enggau naka ulih ngetanka utai berega tu ka penguntung bansa kitai diatu enggau jemah ila,” ku iya.

Lebuh ditanya pasal pengawa echuri tu dipelaba diaduka kompeni menua bukai tauka ari menua tu, Tengah madahka aktiviti nya dikereja raban ke enda bertanggungjawab sereta ngelanggar adat menua.

Iya mega madah JHS selalu ngaga operasi nginau serta nagang ngena bantu polis enggau sedadu laban irauka sida ke enda bertangjungjawab enchuri nya bisi mai senapang.

Kelimpah ari nya, lebuh bejaku, Tengah madah JHS deka ngeringka agi sistem Pengawa Kampung Lestari dibantu opis antarabansa baka International Tropical Timber Association (ITTO) enggau United Nation Development Programe-Global Environmental Facility (UNDP-GEF).

“Tu siti pengawa ke diatur perintah kena ngambi enam juta hektar Kawasan Kampung Simpan Kekal enggau 1 juta hektar agi nyadi kawasan Dijaga Penuh baka Taman Negara, Santuari Jelu Siga enggau Rizab Asal enda lama da agi,” padah iya.

Pasal Hari Kampung Sedunya 2008, Tengah madahka rambai jaku sekali tu ???Anang Enda Sinu enggau Kampung Kitai??? ulih ngajar kitai sayauka rampa menua kelebih agi ngagai bala pelajar.

Hari Kampung Sedunya 2008 sekali tu, ke diatur begulai Perbadanan Perusahaan Kemajuan Kayu Sarawak (PUSAKA) enggau Sarawak Forestry Corporation (SFC).

Sama bisi datai, Sapit Setiausaha Nengeri Datuk Morshidi Abdul Ghani, Pengarah JHS, Datuk Len Talif Salleh, ADUN Lambir, Aidan Wing enggau bala tuai ari opis agensi ke bukai.

Udah nya, Tengah bejadi program nanam bakau ba Sumber Alam Santuari.