Bala MP ari PRS nadai jalai deka engkechit masuk enggau parti penyakal

KUCHING: Presiden Parti Rakyat Sarawak (PRS) Dato Sri Dr James Jemut Masing kemari madah semua bala enam iku kaban parlimen (MP) ari parti iya nya sigi penyukung kuat Barisan Nasional (BN) sereta nadai jalai deka engkechit enggau parti penyakal.

Bala sida MP enam iku ari PRS nya Joseph Entulu Belaun (Selangau), Billy Abit Joo (Hulu Rajang), Datuk Joseph Salang Gandum (Julau), Aaron Ago Dagang (Kanowit), William Nyallau Badak (Lubok Antu) enggau Masir Kujat (Sri Aman).

Ku Masing, bala sida MP enam iku tu sigi ???men of principle???(orang ke bepegai kuat engkabit ba prinsip sida) lalu sigi nadai deka mudi BN sereta madah sida tu udah besumpah penaluk sida ngagai Perdana Menteri Datuk Seri Abdullah Ahmad Badawi dalam siti aum kena hari Enam tu tadi.

Pengari kerusi KN Baleh nya madah, sigi pengawa ti salah ari moral enti bala pengari ke dipilih rayat rari sereta engkechit enggau masuk parti politik bukai, kelebih agi enggau parti penyakal.

“Bala orang politik ke engkechit kia-kia nya tegal sida alah laban pengamu sereta nadai pengelurus ati.

“Ulah sida ke bakanya sigi pengawa mudi sereta nipu bala pengundi ke udah meri mandat ngagai sida, laban deka ka sida nyadi pengari,” ku Masing ke mega Menteri Pemansang Tanah.

Iya madah bala orang politik ke engkechit nya beduduk ari runding enggau penemu sida empu, reti nya sida iya empu aja ke nentuka sida engkechit tauka enda.

Pekara tu dibantai menteri nya ba siti aum enggau pemberita sebedau atur nyuaka prais ngagai sida ke menang ba Pekit Tenis Mangkuk Kepala Menteri ITF Junior Circuit Raban 1 Ke-11 ba premis Gerempung Tennis Padang Sarawak (SLTA) kemari.

Ngenang pasal Adat Tagang Engkechit tauka???Anti- Hopping Law??? ke dibantai Menteri ba Opis Perdana Menteri, Senator Datuk Mohd Zaid Ibrahim, Masing madah nadai bantah enggau adat nya.

Taja pia, pekara nya bisi deka pedis mimit laban ku iya tusah deka ngaga siti adat pasal runding enggau asai ati orang siku-siku.

Iya madah, enti orang nya udah deka muai parti iya lalu engkechit ke parti bukai, nadai adat tauka chakah jaku ulih nagang iya, enda ngira pemayuh (adat enggau chakah jaku).

Kebuah pia, ku iya, munyi ke udah disebut tadi, ulah engkechit ari parti ke parti nya beduduk ari orang politik nya empu, nya alai orang politik nya mesti lurus ati sereta tinggi integriti.

PRS endang semampai enda setuju enggau ulah engkejuk ari parti ke parti, ku iya keran madah.

Masing mega madah ngagai pemberita Perdana Menteri chukup positif pasal peminta mayuh agi MP ari Sarawak dipadu nyadi menteri dalam kabinet perintah Besai.

Taja pia, ku iya, Pak Lah enda patut balat kelalu kena tekan tauka dipejal, laban mayuh prioriti ke bukai deka diperati sereta diputarka iya maya kediatu.

Lebuh ditanya pemanah mayuh agi pengari ba kabinet perintah Besai, bala MP ari Sarawak patut bisi dipadu ba opis menteri ke ngena sereta manah ka pemansang Menua tu.

Ngambika banding, baka Entulu ke nyadi Sapit Menteri Pemansang Pesisir enggau Kandang Menua, iya bisi agi jalai ulih ngenataika mayuh agi pemansang ngagai menua ulu ba Menua tu, kelebih agi kandang menua ti agi balat surut dalam pemansang.