Iban, Sarawak News - Wednesday, December 30, 2009 10:00 - 0 Comments

Begandin ngemajuka Sarawak

Perintah Besai deka meda mayuh agi projek pemansang menua pesisir

KUCHING: Menteri Besai, Datuk Patinggi Mohd Najib Tun Abdul Razak madahka Barisan Nasional (BN) deka bejalaika kunsip begandin mai projek pemansang kena nyungkak pengidup rayat sereta ngemajuka menua tu ba maya ti deka datai.Najib madahka, kunsip begandin antara perintah besai enggau menua  tu deka dipejalaika belaluh ba taun taun ti  deka datai.

Kunsip tu sigi kena nentuka mayuh agi projek pemansang digaga ukai semina ba kandang negeri tang ba kandang pesisir ti tau nguntungka rayat menua tu, ku Najib.

Ku iya, tu ngambika betuju rayat sereta menua tu maju lalu nyamai ba pengidup sereta enda tinggal ari menua bukai udah tu ila.

Ku Najib, nengah kunsip tu dia Perintah Besai deka ngeluarkan belanja sama pemayuh enggau belanja ti dikeluarka Perintah Menua ba semua projek pengawa pemansang ti dipejalaika ba menua tu ila.

“Perintah Besai deka ngeluarka belanja sama enggau penyampau ti dikeluarka Perintah Menua kena ngaga projek pemansang ti tau nguntung rayat ba Sarawak belabuh ba taun baru tu ila.

“Tu ti dikumbai kunsip begandin endang dikena ngangkatka pengidup rayat enggau menua tu dudi ila,” ku Najib.

Iya mansutka jaku tu lebuh ti bejadika Aum Besai Tiga Taun Sekali (TGA) Parti Progresif Sarawak (SPDP) ditu kemari.

Aum tu digulu bala kaban parti nya ari 71 Pampang ba menua tu.

TGA tiga hari tu udah berengkah ensanus enggau bala Raban Nembiak sereta Indu ngatur aum sida.

Bisi datai enggau ngulu pengerami muka aum tu iya nya, Sapit Kepala Menteri Sarawak, Datuk Patinggi Tan Sri Alfred Jabu ak Numpang ti mega Sapit Presiden Parti Pesaka Bumiputera Bersatu Sarawak (PBB).

Jabu ba pengerami tu ngarika Kepala Menteri, Pehin Sri Haji Abdul Taib Mahmud ti mega Presiden PBB.

Sapit Presiden PBB ti mega Menteri Pengawa Berumah enggau Pemansang Nengeri, Datuk Amar Abang Johari Tun Abang Haji Openg bisi mega datai.

Presiden SPDP Datuk William Mawan Ikom bisi mega mansutka jaku pengelalu ba pengerami tu.

Najib dalam jaku iya madahka, iya deka meda mayuh agi projek pemansang patut digaga ba kandang menua pesisir ba Sarawak.

Ku iya, perintah menua tu patut ngemeranka agi pemansang jalai alun enggau penyambung ba menua kelebih agi ngagai rayat ba pesisir.

Kelimpah arinya, iya mega deka meda projek api enggau ai ti bejalaika ba menua pesisir.

“Perintah Menua patut ngaga mayuh agi projek pemansang ba pesisir awakka nguntung mensi mayuh ba kandang menua nya.

“Aku deka meda mayuh agi projek jalai alun enggau penyambung, api enggau ai dikerembaika ngagai kandang menua tu,”ku iya kelalu bebendar madahka perintah besai sigi udah besedia mantu perintah menua tu bejalaika projek tu.

“Kitai enggau meda menua pesisir terus tinggal dalam pemansang jemah ila,” ku Najib nambah jaku iya.

Ngenang pasa projek pemansang jalai alun, Najib madahka madahka perintah besai udah ngelanggur deka ngagai jalai alun sepemanjai 1,500 kilometer di Sabah enggau Sarawak datai ba taun 2012.

Ba projek pemansang bekal ai dia ia nyemetak endar madahka 90 peratus ari kandang genturung pendiau di menua tu mesti dibungkur bekal ai beresi lebuh maya nya ila.

Perintah mega deka meda sekula ba menua tu ti dilengkap enggau perengka ti chukup maya tu ila.

“Tu juluk ati perintah nengah prinsip 1Malaysia,” ku Najib.