Kelvin Dom mujur muka woksyop nuchi kerita

 Email This Post    Print This Post  

(No Ratings Yet)

 Loading ...

UDAH DIJAPAI NIAT ATI: Kelvin benung nuchi kerita ba woksyop iya ke baru dibuka empai lama ke udah di Sibu Jaya.

SIBU: Semina bepukuka RM15,000, Kelvin Dom, 22, udah nyapai juluk ati iya ke deka muka woksyop nuchi kerita iya empu.

K & 6B Car Wash enggi Kelvin ba Lot 1196, No.21, Sibu Jaya udah dipenyadika bedau lama ke udah.

Pengawa bejadika woksyop nya dipejadika  Kunsilor Opis Kunsil Pelilih Luar bandar Sibu (MDLBS) Kunsilor Pasang.

Kelvin anak kelima ari enam iku diri menyadi lebuh ke dikerandau madahka niat ati iya ke deka muka woksyop nuchi kerita nya endang udah lama ba iya.

“Semina aku bedau teulihka chukup peneleba enggau puku ke chukup ungkup nyuwa kedai.

“Tang, seninjik bendar apai indai enggau kami sebilik nyukung pengawa tu.

“Kelimpah ari nyendiaka kereban dikena nuchi, sida mega mantu aku nengah chara meri peransang,” ku iya.

Kelvin madahka, sebedau tu iya kala bekereja nyadi tukang tuchi kerita kelimpah ari kereja mekanikal bukai.

Kenyau ari nya, iya chakah agi nyungkak pengelandik sebedau ngambi pemutus ngetu gawa udah nya muka woksyop nuchi kerita iya empu.

Ku Kelvin, iya deka dibantu empat iku orang ke diambi gawa.

Sekeda servis ke bisi disediaka ba woksyop iya nya baka nuchi, ngilat enggau meresi dalam kereban pengangkut.

Kelimpah ari nya, woksyop iya mega bisi nyendiaka servis nuchi mutosikal nengah bayar RM3 aja.

“Chas nuchi kerita RM10, 4WD (RM15) enggau  van RM20,” ku iya.

Ditanya sekalika iya deka nyendiaka servis bukai, Kelvin madah naka ke diatu iya semina numpu ngagai pengawa nuchi aja.

Category: Berita Iban, Sarawak