Belanja ukai nyadi ke penanggul nyengula anak

 Email This Post    Print This Post  

(No Ratings Yet)

 Loading ...

Belabuh tumu nyimpan sereta lengkaka ulah ngayahka duit

SIBU: Penanggul suntuk belanja dikena nyengulaka anak nyentuk ke renggat universiti ulih diseliahka enti bala apai indai landik magi belanja.

Penemu tu dibantai pengelicha jaku peransang Dr Charlie Dudang maya iya dikangau meri licha ba Tabika KEMAS Kampung Sungai Laru, Kuching, empai lama tu tadi.

Ku Charlie, ketegal tu bala apai indai aruh belabuh tumu besimpanka duit kelebih agi kena napi pemansang pelajar anak.

“Lengkaka ulah rindu ngayahka duit tauka mubuhka belanja ba pekara ti enda patut.

Ambika banding baka ulah ngirup arak, bejudi, nyabung, nginsap enggau gila indu,” ku iya madah ba pengawa ke digulu 150 iku bala apai indai nyengkaum nembiak tabika Taun 1 enggau Taun 2 nya.

Nambahka nya ku iya, bala apai indai mega mupuk nempa ulah besemak enggau anak baka ba pengawa ngembing anak belajar di rumah.

Kebuah pia ku Charlie, tu sebengkah ari chara nyaup ngemansangka pelajar anak enda ngira ba kelas tauka ba sekula aja.

“Bisi sekeda bala apai indai semina nejuka bala pengajar megai tanggungpengawa ngajar anak ba sekula.

“Penemu tu enda tau dikena tang kitai apai indai nadai penyalah ngembing anak belajar di rumah,” ku iya madahka baru.

Berebak enggau tu Sekretari Raban Nembiak Parti Sa’ati Rayat Sarawak (SUPP) ke mega dipelaba ngarika Parlimen Stampin ba Pengawa Bepilih Besai deka datai Wilfred Yap ngelalau bala ke bisi datai ngambi ngenataika penanggul sida ngena jalai ti betul.

Ambika banding ku iya baka penanggul bekaul enggau tanah adat Bumiputera (NCR), surat pengada, tingki tauka penanggul bukai tau dibai ngagai opis perintah lalu ukai ngagai parti penyakal.

“Kitai enggai sida ti ngenggaika perintah beambi ulih ari penanggul ke nuntung rayat.

“Nya alai, enti bisi penanggul bai penanggul nya ngagai opis perintah ngambika tau diputar ngena jalai ti ngena,” ku iya sambil ngarapka sukung rayat ngagai perintah maya pengawa bepilih besai deka datai.

Bela bisi datai maya tu iya nya Pemesai Opis Parlimen Stampin Sih Hua Tong, bala pemesai ari Opis KEMAS enggau pemesai ari opis pemadah menua nya.

Category: Berita Iban, Sarawak