Ajar niang Michael ba aku nyelai ari selama: Frankie

 Email This Post    Print This Post  

(No Ratings Yet)

 Loading ...

SINU: Bala kaban belayan enggau anak niang meri basa ngagai niang.

SERIAN: Jaku ajar ari ipar aku nya enda memukai, ke penudi didinga ari niang ASP Michael anak Padel ngagai Sarjan Frankie anak Mingku (menyadi bini niang), 26, sebedau niang angkat ke Semporna.

“Lebuh aku betelefon ngagai niang pukul 9.00 malam (lebuh iya di Kunak) berapa hari sebedau iya angkat ke Semporna, jaku iya lain mimit, jaku ajar iya lebih ari selama. Nyangka bisi 20 ngagai 25 minit kami duai berandau.

“Iya madah enti kitai udah niki pangkat, anang sesekali sumbung enggau orang. Kitai patut manah enggau orang belama enda ngira pangkat tauka sapa orang nya. Gaji simpan memanah laban ulih dikena dudi hari ila,” ku Frankie, ipar niang ke nyadi polis di Nusa Jaya Johor.

Utai ke ngenyinuka ati Frankie, laban iya enggau ipar iya udah ngaga perambu deka ngatur pengawa tikah Frankie enggau indu Kota Belud, Sabah kena 3 Jun taun tu.

“Engka bedau dulu meh ngatur pengawa tikah nya, laban bedau lantang ati. Nganti ujung taun sekali,” ku iya lalu nambah penudi sekali betemu enggau niang maya Gawai Dayak 2011.

Ba Edward Andrew Luak, niang kena kaban ba sida sebilik lalu berita pemati iya ngenyitka sida sebilik.

“Kami udah lenyau seiku kaban, pangan lebih agi bujang berani ke udah berambunka nyawa nyaga pegelikun menua.

“Endang enda disangka utai baka tu nyadi. Kami seruran besampika pengelikun di Sabah,” ku iya ke baru nemu berita pemati niang dua hari tu ke udah.

Bakih ke diau di genturung pendiau ke sama enggau niang, sereta besekula enggau niang ari sekula primari ngagai sekondari, Moses Bijai, 36 madah, nadai meh agi orang ke ulih enggau iya ngaga perambu Hari Gawai Dayak tu ila, baka ke kala disebut niang empu ba iya.

“Seminggu sebedau iya angkat ke Semporna, kami duai bisi berandau dalam telefon ke alai iya aku ngasuh aku ngatur pengerami Gawai Dayak taun tu di kampung kami laban iya nyangka tusah mimit ngatur laban jauh ari menua.

“Nyau enda munyi ke ukai iya ke parai….Enti iya pulai ke menua, aku belama meh ke selalu digiga iya dulu,” ku Moses ke diau takah dua pintu ari rumah niang.

Category: Berita Iban, Sarawak