Wan: Manifesto PR dikena ngelaburka mata pengundi

 Email This Post    Print This Post  

(No Ratings Yet)

 Loading ...

KUCHING: Semaya ti ditempa Pakatan Raykat (PR) ba taun 2008 suba enda ulih dikeamatka, bakani deka ngamatka manifesto pengawa bepilih besai ti ke-13 ke enda ngemeratka pekara ekonomi sereta sosial? Pekara nya dipadahka Kaban Parlimen Santubong, Datuk Dr.

Wan Junaidi Tuanku Jaafar ngagai Utusan Borneo lebuh ti ngenang manifesto parti penyakal ba pengawa bepilih besai ti ke-13 (PRU13).

Iya madah, manisfesto nya semina politik parti penyakal ti enda ulih dikeamatka.

“Semua nya politik PR ti enda ulih dikeamatka.

Enti semaya ke ditempa taun 2008 suba bedau dikeamat bakani deka arapka sida ulih ngamatka nya (manifesto).

Tambah mega mayuh pekara ekonomi, sosial enggau implikasi gaya belanja enda dikemerat.

“Elekterik enda bebayar, ni semaya bekal ai Selangor, semua nya bedau ulih nyadi nyata, diatu besemaya deka nyendiaka servis enda bebayar ba wad kelas 2 enggau Kelas Tiga, ari ni penatai duit sida deka nyendiaka semua nya enggau enda bebayar.

“Terang bendar semua semaya nya ukai deka dikeamat, tang semina kena nyaru mata pengundi ngena semaya bula.

Rayat ingat nama pekara ti disemayaka dulu ari tu ti bedau dikeamatka lalu bakani ulih nerima semaya baru,” ku iya ti nyadi Sapit Dewan Rakyat.

Nambahka nya iya ngenang PR dalam manifesto deka nyendiaka pelajar enda bebayar berengkah ari renggat sekula nyentuk ke IPTA enggau meri sabsidi ngagai nembiak IPTS, iya madahka, nama implikasi ditanggung menua.

Pansik mega nunjukka sekula enggau universiti ti berenggat tinggi pan bisi bayar, ku iya.

Ku iya mega madahka sabsidi minyak menua diatu chukup sereta Malaysia sebengkah menua ti pemadu murah rega minyak.

Malaysia meri bebiliun sabsidi minyak, ukai enda meri.

“Enti nyema kitai nambahka (sabsidi), nya meri pangka ke besai ngagai menua ti deka mansang, lebih agi di menua pesisir,” ku iya.

Kelimpah ari nya, iya madahka PR ti deka ngetuka AES mandangka sida nadai mansik pengerusak sereta penusah bebadi ba jalai alun ngelama tu ari pekara ekonomi enggau pemati, ti meri pengerugi bepuluh biliun.

Ukai ka nya (AES) ulih ngurangka penusah bebadi nya, ku Wan Junaidi.

“Manifesto Pakatan Rakyat” nyerumba Pengawa Bepilih Besai ti Ke-13 (PRU13) enda lama agi, ti ngerintai lima pekara ti dikemerat ti nyengkaum Rayat Bemenyadi, ekonomi rayat, pengelantang rayat, perintah rayat enggau pengadang tauka pengingin rayat.

Category: Berita Iban, Sarawak