SLDN milih SCV palan endur matih pekara muzik enggau audio

 Email This Post    Print This Post  

(No Ratings Yet)

 Loading ...

SANTUBONG: Sarawak Cultural Village (SCV) dipilih nyadi palan pematih program ‘Sistem Latihan Dual Nasional’ (SLDN) ti dipejalaika Opis Pemansang Pengelandik (JPK) nengah Opis Menteri Menteri Penguasa Mensia Mayuh enggau Pengereja Pengawa.

Program keterubah SLDN ti matih pekara muzik enggau audio matak 160 iku orang ari pelilih Kuching, Bau, Lundu, Serian, Simunjan, Kota Samarahan, Miri, Bintulu, Sarikei, Sri Aman enggau Betong ti beumur entara 16 ngagai 35 taun.

SLDN ditumbuh ngambika ngada raban pengereja pengawa ti ngembuan pengelandik nengah atur latih ti engkeman lalu tebal agi dikena napi pinta pengawa puang di mayuh bengkah industri.

Menteri Muda Dagang Temuai Datuk Talib Zulpilip madahka pemutus JPK begempung enggau SCV bejalaika program nya tau endar mai pemujur lalu deka mulaika pemaik ngagai penyereta kelimpah ti dipeda tau ngangkatka ekonomi Sarawak.

Ku iya, SCV ngembuan penau sereta peneleba renggat antarabansa dalam pekara muzik enggau audio ke alai palan nya suah ngatur pengerami muzik ke tebilang.

“Penau enggau peneleba ke dikembuan raban orang gawa ditu (SCV) tau endar disadung ngagai raban penyereta program SLDN.

“Aku perchaya SCV ulih nyapai juluk JPK lalu ngadaka raban orang ti landik dalam kededua pekara tu,”Ku Talib seraya ti madah pengelandik udah nyadi sebengkah pekara ti chukup diguna kemaya hari tu.

Iya mansutka jaku nya ba pengawa bejadi Program Sistem latihan Dual Nasional di Dewan Lagenda SCV ditu, kemari.

Iya ke mega Chairman Gerempung Pemansang Ekonomi Sarawak (SEDC) netapka pengelandik nya deka ngangkatka produktiviti kereja seseiku orang gawa lalu nyaup ngerembaika ekonomi menua.

“Ngembuan bemacham pengelandik gawa siti pekara ti pemadu beguna.. ari nya tadi kitai ulih nambahka produktiviti kereja.

“Orang ke ngembuan pengelandik suah nerima gaji ti besai kelebih agi ba menua maju baka ba Jipun enggau Eropah ke alai menua kitai mega benung nuju ngagai atur nya,”ku iya.

Dulu agi ari nya, Direktor program SLDN, JPK Mohamad Yaacob madahka nagit deka matih sepenyampau 4,000 iku orang nengah kerejasama begulai enggau SCV.

“Naka ke diatu kitai mujur nyapai tagit teulihka 4,000 iku penyereta ke alai bisi 2,000 iku agi udah mega ngenataika pinta.

“Kitai mega bisi nyendiakka program SLDN ba atur ngangkatka tikas gred iya nya ari gred 2 ngagai 3 tauka 4 lalu diungkupka ngagai 1,000 iku orang aja.

SLDN besereta insentif mega meri awak ngagai 1,000 iku orang,’ku iya seraya ti madah 6,000 iku dipilih ari ketetiga program SLDN nya.

Ba taun 2013, JPK nagit deka matih sepenyampau 16,000 iku orang nengah kerejasama begulai enggau ijinsi perintah ba mayuh bengkah pengelandik.

Program SLDN ti dipunka ba taun 2005 udah matih 38,000 iku orang serata Malaysia naka ke diatu.

Raban keterubah program SLDN ungkup penyereta bulan Februari enggau March deka nempuh timpuh 10 bulan belajar di SCV ke alai sepengudah tembu sida iya deka nerima Setipikit Pengelandik Malaysia (tikas 1, 2 enggau 3).

Category: Berita Iban, Sarawak