Peranak menua nyangka deka nyekat Jalai Tubau/Sg Asap

 Email This Post    Print This Post  

(No Ratings Yet)

 Loading ...

KUCHING: Peranak menua Bakun nyangka sekali agi deka nyekat sepemanjai jalai Tubau/Sg Asap mandangka pengirau ati sereta pengeringat enggau gaya jalai ti nyau majak jai.

Raban nya ngansak ijinsi ke megai tanggung pengawa bejalaika atur ti patut ke tau nentuka jalai sepemanjai 100 Km nya likun.

Chairman Komiti Pengelikun Komuniti (BCSC) Dr Elli Luhat madah, gaya jalai nya majak jai lebih agi maya hari ujan ke alai peranak Bakun ngarapka ijinsi ke bekaul bejalaika atur ti patut enggau naka pengelengkas.

“Mensia mayuh ke diau di Bakun udah lama ngenatka pemerinsa lalu diatu pengeringat sida udah mansau.

Aku dipadah raban nya benung nyikap diri deka ngaga sekat baru nyadika chara mandangka pengeringat,” ku iya.

Nitih penerang ari Elli, pejalai luri batang ke nadai lisin berangkutka kayu entara kebuah ti udah ngerusak jalai Bakun ke alai jalai nya mega udah enda likun ditengah entukar ke mit tauka mutosikal.

“Pekara tu bangat ngenusahka semua lalu ngeruga pengelikun orang ti betengahka jalai nya.

Kitai enggai nyadi nyalahka sida iya enti peranak Bakun tu ngaga sekat jalai,” ku iya nambah.

Elli madah, ba atur tu ijinsi ke megai kuasa patut enggau naka pengelangkas mutarka penanggul nya.

Pengawa ngulihka penemu ari kaban parlimen Baram ke mega Sapit Menteri Dagang Antarabangsa enggau Industri Datuk Jacob Dungau Sagan kemari enda mujur.

Diperitaka ADUN Belaga ke mega Menteri Muda Main Asal enggau Pesaka udah suah mai pekara tu ngagai perintah sereta kala mega dikerandau maya aum DUN.

Taja pia, naka ke diatu, nadai atur dipejalai ngemanahka jalai nya sereta meresa semua luri batang ti berangkutka kayu.

Category: Berita Iban, Sarawak