KPDNKK deka numbuhka KR1M ba tiap bengkah parlimen S’wak

 Email This Post    Print This Post  

(No Ratings Yet)

 Loading ...

KUCHING: Opis Menteri Dagang Dalam Menua, Gerempung Kerejasama enggau Pekara Bebeli Barang (KPDNKK) deka numbuhka Kedai Rakyat 1Malaysia (KR1M) ba tiap bengkah parlimen Sarawak.

Menteri nya, Datuk Seri Ismail Sabri Yaakob madahka, nya ngambika semua rayat lebih agi ke diau ba menua pesisir bela ampit bebelika barang ti berega murah.

“Kitai deka numbuhka KR1M ba tiap parlimen di Sarawak.

Keterubah iya kitai deka nukuka dulu tiap parlimen di Sarawak enggau sebuah KR1M, taja pan parlimen di Semenanjung Malaysia bedau semua ditumbuhka KR1M,” ku iya dalam aum pengarang berita kemari.

Dulu ari nya iya bejadika KR1M Medan Hamidah ba parlimen Petra Jaya ti diatur KPDNKK ba Medan Hamidah Demak Laut ditu kemari.

Sebedau tu ku iya perintah udah mujur numbuh sereta ngemansangka 85 buah KR1M dalam timpuh 18 bulan.

Ba taun 2013, perintah beperambu deka numbuhka 57 buah KR1M di Sabah, Sarawak enggau Labuan.

Sehari tu, bisi tiga buah KR1M dibuka ba Sabah enggau empat buah KR1M dibuka ba Sarawak nyengkaum KR1M di Medan Hamidah.

Kedai Rakyat 1Malaysia keterubah iya dibuka dalam taun 2013 iya nya KR1M di parlimen Mambong kena ke 31 Januari tu tadi.

Dalam jaku pengelalu Menteri Muda ba Opis Kepala Menteri (Pemansang Orang Dagang Bumiputera) Datuk Mohd Naroden Majais madahka KR1M nya sebengkah langgur ti engkeman ari perintah.

“KR1M ukai semina meri pangka ti manah baka nyendiaka rega lebih murah ngagai rayat ke bebelika barang aja, tang mega ulih meransang orang dagang ngeluarka produk ngagai makit ke besai agi,” ku iya.

Category: Berita Iban, Sarawak