DCF deka ngenegapka kereban bacha Jaku Iban

 Email This Post    Print This Post  

(No Ratings Yet)

 Loading ...

Pengawa nya ngemuntangka atur nyelak bup ke deka nguntungka urung 20,000 iku nembiak di S’wak

AUM MEDIA: Jabu (tengah), Uggah (lima kiba), Anthony Banyan (tiga kanan), Nellie (lima kanan) enggau Jimbun Tawai ari MAIS (empat kanan) ba aum media bejuraika penyendia ngaga tiga buah bup, kereban bacha dalam Jaku Iban.

KUCHING: Komiti Pengatur nengah Dayak Cultural Foundation (DCF) deka ngeluarka tiga buah bup dikena nyikap sereta ngenegapka kereban bacha dalam Jaku Iban ngambika bisi dikena ba sekula primari enggau sekondari di serata menua Sarawak.

Sapit Kepala Menteri Datuk Patinggi Tan Sri Alfred Jabu madah, tiga buah bup ke mungkur matapelajar ba sejarah Iban, chara ke betul ngena Jaku Iban nyengkaum belajar pemun Jaku Iban enggau identiti Iban sereta adat dipelaba tembu sebedau Gawai Dayak taun tu ila.

Iya madah bajet RM2 miliun ti diungkupka Perintah Besai enggau Perintah Menua nengah DCF deka dikena nyendiaka penembu tiga buah bup tu ngambika tau dikena ba sekula primari enggau sekondari.

“Komiti pengatur projek tu udah ditumbuh ti betuaika Menteri Pengeraja Asal enggau Rampa Menua Dato Sri Douglas Uggah Embas, alai sekeda bup tu udah dirurun memanah sereta ba renggat penudi,” ku iya.

Iya madah baka tu ba aum media ti bechairmanka iya empu (Jabu) begulai enggau ” “Uggah, chairman Opis Kunsil Adat Bansa Asal Menua Sarawak Datu Nellie Tangai sereta sekeda komiti bukai ari macham Gerempung Ukai Dikuasa Perintah (NGO) enggau ijinsi perintah bukai.

Jabu ti mega Chairman DCF madah, komiti tu ila diasuh nyendiaka pengawa nyelak bup ke dikena di sekula primari, sekondari enggau palan pelajar tinggi (IPT) ngena geran ke udah diberi perintah besai enggau perintah menua nengah DCF.

“Nengah riput ke diterima aku ari semua komiti, sida udah ba renggat penudi sereta pengawa nya dipelaba deka tembu sebedau Gawai Dayak lalu kitai deka ngemunka tiga buah bup dalam Jaku Iban ke deka dikena ba semua sekula ke bisi ngajar Jaku Iban di serata menua Sarawak,” ku iya.

Berebak enggau nya Jabu madahka pengaga diri sereta nengah DCF ngenataika terima kasih ngagai perintah besai ke udah ngemendarka bantu dikena nyelak bup teks dalam Jaku Iban ke deka dikena ba 730 buah sekula primari enggau sekondari di serata menua Sarawak ke mungkur urung 20,000 iku nembiak sekula belajarka Jaku Iban.

“Jaku Iban mega dikelala perintah besai, sebaka enggau jaku Tamil sereta Mandarin ke diajar ba semua sekula di Malaysia.

“Kami nemu tapi pelajar Jaku Iban endang besai nya kebuah komiti tu ditumbuh dikena nyikap sebarang atur ngambika mujur.

Ari nya kaban komiti tu mega orang ke mayuh peneleba sereta komited, lalu kami arapka projek tu nadai penanggul lalu pia mega begunaka sebarang bantu dikena ngemujurka pelajar Jaku Iban ba sekula,” ku iya.

Kelimpah ari nya mega, DCF deka bekerejasama enggau Opis Menteri Pelajar (MOE) sereta Opis Pelajar (DOE) nerima sebarang penemu tauka atur ke patut ari kededua opis perintah tu nitihka Turai Pelajar Jaku Iban baka ke diajar diatu.

Naka ke diatu, kos Jaku Iban bisi diajar di Palan Pematih Pengajar (IPG) di Meradong ke udah ngambi pelatih pengajar ngambi kos Jaku Iban ke deka nurai degree dalam kos tu, lalu udah abis latih ila, raban pengajar ke ngambi kos tu deka ngajar Jaku Iban.

Lalu pia mega di Universiti Pendidikan Sultan Idris (UPSI) di Tanjung Malim, Perak ke bisi ngajar renggat Diploma kos Jaku Iban sereta nerima timbal ke manah ukai semina ari nembiak Dayak aja tang ari bansa bukai.

“Nengah pemansang Jaku Iban ke ulih dipelajar genap raban bansa di Sarawak, pengawa baka tu ulih nyadi pelasar penyerakup rayat ba renggat perintah menua ke endang seruran dikesiruka perintah,” ku iya ke ngarapka projek nyelak bup teks tu meri mayuh peneleba ngagai rebak baru nyengkaum sida ke beruangn bilik enggau bansa bukai.

Naka ke diatu, Turai Pelajar Jaku Iban ke dikena di sekula diatu dikumbai Matapelajar Elektif (siti ari matapelajar ke dipilih nambahka matapelajar bukai di sekula) ke diajar ari sekula primari nyentuk ke renggat SPM.

Category: Berita Iban, Sarawak