BDA nyendiaka 60 polis bantu ba SIP

 Email This Post    Print This Post  

(No Ratings Yet)

 Loading ...

BINTULU: Gerempung Pemansang Bintulu (BDA) deka nyendiaka urung 60 polis bantu dikena bejalaika pengawa nyaga sereta mantau ba Taman Perindustrian Samalaju (SIP) kediatu diaku nyadi palan ke enda tau dipasuk sebarang orang.

Direktor Kanan nya, Datu Mohidin Ishak madah, kelimpah ari ti nyendiaka polis bantu, sistem pagar pengelikun, opis endur ngenduh enda lama, palan endur ngengkah kerita enggau seruyuk jejaga mega digaga.

“Tu atur tekala nya ke digaga kami kena nyaga semua barang tauka perengka kilang raban orang betanamka puku ke beungkus bebeliun ringtit ba SIP,” ku iya bejaku maya betemu enggau pengari raban orang betanamka puku ba laman pintu seruyuk jejaga SIP lemai kemari.

Mohidin madah, tegal diaku nyadi palan endur ke enda ulih dipasuk sepeneka ati, mensia mayuh semina dikemendarka tama enti bisi pas tama ari pemesai jejaga enggau pemesai SIP.

Iya bejaku, BDA mega merambu ngaga hotel, perengka pengawa berumah, opis, enggau kuarter Opis Pengereja Pengawa, Kumpulan Wang Simpanan Pekerja (KWSP), Pertubuhan Keselamatan Sosial (PERKESO) enggau kuarters perintah.

“Kami mega deka nyendiaka pengawa ngambi uras ba pelilih ngelingi SIP dalam awak ke semak.

“Pengawa nya diadang digaga dala timpuh enam tauka lapan bulan nyentuk ke setaun berengkah ari diatu,” ku iya.

Tandu iya, BDA mega deka nyendiaka perengka guna ungkup pengereja pengawa BDA enggau perintah ke gawa ba SIP, kelimpah ti ngaga empat buah hotel enggau perengka guna bukai ungkup orang betanamka puku ngambika sida enda berundang ke Bintulu ti begunaka masa lama sereta jauh.

“Kami mega nguji ngereja pengawa tu enggau jampat sereta deka ngena agih ke udah diberi,” ku iya.

Pia mega, ku iya, raban iya deka ngemansang sebuah mengeri ba SIP.

Kelimpah ari nya, Kepala Polis Pelilih Bintulu Superintenden Madang Usat madah, piak iya mega deka nganjung raban polis ke dibantu kaban RELA enggau Opis Nyaga Pengelikun Orang Priman Malaysia (JPAM) kena nyaga raban orang betanamka puku ba SIP.

“Kami nirika seruyuk polis nyerumba enggau pemadah (SIP) nyadi palan ke enda ulih dipasuk orang sepeneka ati sereta dijaga ba baruh sistem pagar pengelikun ungkup penama raban SIP, kami deka meresa enggau jampat ba semua pengereja pengawa ke masuk SIP ngambika enda besekut sereta laun nurun gawa.

“Utai ti beguna bendar iya nya pas masuk enggau logo Samalaju kelimpah ba sekeda kes pengawa meresa deka diatur enggau terit,” ku iya.

Category: Berita Iban, Sarawak