Barisan Nasional andal ulih ngetan parlimen Baram

 Email This Post    Print This Post  

(No Ratings Yet)

 Loading ...

MIRI: Barisan Nasional (BN) andal ulih ngetanka parlimen Baram belalauka sukung ke diterima ari rayat ba sitak nya beberapa taun tu ke udah.

Penyandang Kaban Parlimen Baram (MP) Datuk Jacob Dungau Sagan madah BN diatu benung dalam 90 persin udah nyikap diri napi pengawa bepilih.

“Aku enggai madah kami udah besedia 100 persin, laban bisi sekeda endur ke dipegai aku aruh diserenih dulu ngambika BN ulih mujur enggau lanchar maya pengawa bepilih ila,” ku iya madah ngagai The Borneo Post pengudah tembu bejadika Latih Tuai Raban Bansa Kayan, ensanus.

Sagan, ke mega nyadi Sapit menteri dagang Antarabansa enggau Industri madah, isu bekaul enggau tekat ai ke dibantaika penyakal enda ngemuntangka juluk nya (menang).

Iya enggau nyemetak madah isu ke dipansutka penyakal nya semina kena ngeruga runding rayat tang enda ngachau pengering BN sekumbang tu ke udah.

“Bekaul enggau tekat ai, kitai bedau nemu kemaya perintah deka ngaga tekat ai nya.

Pansik enggau pemutus bedau bisi didinga ari perintah.

Nya alai, isu tekat ai nya semina dikena penyakal ngulihka sukung rayat ngambika ngundi sida maya pengawa bepilih ila,” ku iya serayamadah nya siti ari chara kamah penyakal ti ngerachun runding sereta ngenakutka rayat ke dipadah sida (penbyakal) ngeruga pengidup, adat enggau main asal peranak ke kena bungkur projek nya.

“Nya alai, nya ukai bereti iya rayat aruh milih penyakal laban enti sema tekat ai nya digaga ila, kitai (perintah) deka mindahka sida ngagai palan ke likun agi kelimpah ari nyendiaka sida mayuh perengkaguna enggau penguntung bukai ti ulih ngangkatka tikas sosioekonomi,” ku iya.

Maya nyaut tanya iya bisi peluang besai nyadi chalun ngetanka sitak Baram, ku iya, nya pulai ngagai pemutus Menteri Besai Datuk Seri Najib Tun Razak.

Ba pekara bukai, bekaul enggau jalai Lapok, Sagan madah projek benung dipejalaika lalu disadang tembu ba pengujung taun 2014.

“Simpang Mamut-Beluru, Beluru-Jematan Lapok enggau Jematan Lapok -Sg Teru chukup panjai.

Barang nama utai ke digaga kitai, kitai deka napi pemedis dulu sebedau kitai mujur.

“Baka nya mega utai tu deka nyadi ditu.

Kitai aruh ngena jalai ke udah digaga taja pan bedau chukup manah laban enti udah amat-amat tembu ila kitai deka ngasaika penyamai sereta ulih ngemuntangka pejalai nuju Long Lama,” ku iya.

Bisi 60 iku tuai raban bansa Kayan enggau Komiti Pemansang enggau Pengelikun Genturung Pendiau (JKKK) ari 22 buah genturung pendiau ngulu latih nya.

Latih nya diatur kena ngelatih tuai raban bansa napi program ubah pemansang ke dipejalaika perintah ngagai menua pesisir.

Sama bisi datai ba pengawa nya Kaban Kunsil Nengeri (ADUN) Telang Usan Dennis Ngau, Residen Miri Antonio Kahti Galis, ketuai raban bansa Kayan Pemancha Elizabeth Deng enggau ketuai raban bansa Orang Ulu Miri Temenggung Pahang Deng.

Category: Berita Iban, Sarawak