Sepuluh Kelab Lions mantu peranak Rumah Augustine Meringai

 Email This Post    Print This Post  

(No Ratings Yet)

 Loading ...

SIBU: Sepuluh Kelab Lions ditu besaup mantu rayat Rumah (Rh) Augustine Meringai ba Nanga Tutus, Batang Igan ketegal rumah panjai sida angus kena 23 Januari tu tadi.

Kelab Lions ke lempung jari nyuaka bantu tu iya nya Kelab Lions Sibu Host, Kelab Lions Sibu Central, Kelab Lions Sibu Seduan, Kelab Lions Sibu Pahlawan, Kelab Lions Sibu City, Kelab Lions Sibu Jaya, Kelab Lions Sungai Merah, Kelab Lions Bawang Assan, Kelab Lions Sibu Mandarin enggau Kelab Lions Sibu Berjaya.

Pemeri nya disuaka Sapit Gabenor Kedua Daerah 308-A2, Dato Betty Wong ngagai Sekretari Politik Kepala Menteri, Andrew Shilling Bangit ti ngarika Tuai Rumah Augustine.

Ku ex- Gabenor Daerah 308-A2 Augustine Ngu, semua Kelab Lions ditu begempung nyuaka bantu nya sepengudah macha penusah ke nuntung rumah panjai nya.

Nya alai ku iya, sida bekenaka duit turu ngelama tu dikena mantu peranak rumah panjai nya meli ramu kena ngaga ensarau dulu.

“Kitai ngarapka bantu tu ulih ngelempungka agi penusah ti nating sida,” ku iya.

Rumah panjai 12 pintu nya angus urung pukul 7.15 pagi kena 23 Januari tu tadi.

Maya penusah semina dua pintu aja bisi orang nguan bilik seraya sida ke bukai benung gawa tauka diau ba mengeri.

Category: Berita Iban, Sarawak