Renggat keterubah BRIM 2.0 udah disua

 Email This Post    Print This Post  

(No Ratings Yet)

 Loading ...

KAPIT: Kaban parlimen Kapit, Datuk Alexander Nanta Linggi pagi kemari udah nyuaka baucher BRIM 2.0 ngagai renggat keterubah ti mungkur 316 iku penerima ari raban bansa China ba Pusat Sivik ditu.

Ku Alexander, “ pagi tu kami deka nyuaka BRIM 2.0, RM 500.

Sehari tu mega raban bansa China deka nerima bantu duit nya dulu ngambika bisi dikena ngintu Taun Baru China.

Pelaba aku agi mayuh orang ke bisi minta enda nemu diri nerima duit bantu seharitu.

Nya alai aku nesau semua ketuai raban bansa enggau NGO madah ke sida. Tu renggat keterubah bantu tu diberi ngagai orang ke udah bisi ruang bilik sereta orang tuai ”.

Iya mega madahka diri lantang endar ati meda atur dipejalai nyuaka baucher BRIM 2.0 nya ti manah sereta teatur.

“Perintah BN ari baruh pegai Menteri Besai Najib Razak nengah BRIM 2.0, meri bantu RM 500 ngagai orang ti mit penatai pemisi dikena ngelempung tating belanja sida.

Perintah mega deka bekunsi enggau rayat ba pemujur pengangkun, ‘1Malaysia Rayat Diseridi,Pemujur Dipelemati’.

Diatu mayuh macham sekim bantu diberi lebih agi ngagai ruang bilik ngembuan penatai pemisi ari baruh RM 3000 (penatai pemisi melaki bini dipegulaika).

Kelimpah ari nya, nembiak sekula pan bisi diberi bantu RM100 ngambika bisi dikena sida meli kereban sekula”, ku iya.

“Kami udah belajar ari pengilap ke suba.Nya alai, sekali tu kami arap endar ati ulih nyuaka semua bantu tu nitihka maya ti udah ditetapka ba Kapit.

Kami mega udah magi sida ngagai dua raban, iya nya N.54 Pelagus dipejalai/ disuaka Opis Pelilih Mit Menua lalu N.55 Baleh deka dipejalaika Opis Residen”, ku iya.

Ku Elvis baru, lebuh baum enggau pemesai ari Opis Wang Putrajaya, Kuala Lumpur kena 14 Januari nyin tadi, sida ngemeratka raban bansa China dulu nerima duit ngambika bisi dikena sida ngintu Taun Baru China.

“Ungkup orang ti diau ba menua pesisir, sida enda ibuh nurun ke pasar kitu ngambi baucher nya laban sida deka nyadung baucher nya ngagai kandang menua nya.

Kami enggau meda sida nguna duit nya mayar kena ungkus nurun kitu.

Enti nitihka maya ti udah ditetapka, raban bansa China nerima baucher nya kena 4 Februari tu tadi ba Pusat Sivik,raban bansa Melayu nerima baucher nya kena pagila 7 Februari ba rumah panjai ke semak enggau sida sereta udah datai jalai, 13 Februari ba Rumah Daniel Dian ungkup peranak menua di Kaki Wong, 15 Februari ba Rumah Pilai ungkup peranak menua Pala Wong, 16 Februari ba Rumah Jelaini, 19 Februari ba Rumah Pasang, Nanga Ensilai ungkup peranak menua di Nanga Yong, Sungai Menuan enggau Sungai Belawai”, ku iya.

Category: Berita Iban, Sarawak