Rayat Rh Sreward ke kena tasah bah diberi bantu tekala nya

 Email This Post    Print This Post  

(No Ratings Yet)

 Loading ...

KUCHING: Rayat Rumah Steward Belintang di Roban ti dipindahka ngagai palan pemindah sementara ti kena ampuh bah udah nerima bantu tekala nya baka barang pemakai ari Opis Pengintu Pengelantang Raban Bansa Nengeri (JKMN).

Menteri Pengintu Pengelantang, Orang Indu enggau Pemansang Ruang Bilik Datuk Fatimah Abdullah madah, bantu tekala nya pekara ti chukup dikemeratka opis pengudah nerima riput pasal orang ti kena tasah bah.

Ku iya, pekara keterubah dikereja opis nya iya nya nyendiaka bantu pemakai ti udah dipanduk sebedau meri pemakai rangkai.

Bantu pemakai ranagkai nya nyengkaum beras, mi segera, pemakai dalam tin, biskut, kopi, teh, gula enggau minyak kena bepanduk.

“Nyentukka pukul 12 tengah hari tadi (kemari) kami dipadahka 27 ruang bilik ti nyengkaum 89 iku rayat rumah nya udah dipindah ngagai palan pemindah sementara iya nya ba Dewan Masyarakat Roban,” ku iya ba sebengkah aum pengarang berita ditu, kemari.

Nitihku Fatimah nya statistik ari opis ti diriputka tiap empat jam sekali.

Ku iya semua sida nya ari rumah panjai Steward Belintang nyengkaum Perumahan Rakyat Miskin Tegar (PPRT) ti semak nya.

“Tu ti kedua kali udah rumah panjai nya kena penusah bah, sebedau tu iya nya 10 Januari tu tadi,” ku Fatimah.

Kelimpah ari nya, Direktor Opis Pengerara Api enggau Penyelamat Malaysia (JBPM) Sarawak Nor Hisham Mohammad ba aum pengarang berita madah sida bisi nerima riput bah ari Rumah Steward sereta mujur mindahka sida ti kena tasah bah urung pukul 8 malam, Hari Dua tu tadi.

Nor Hisham madahka, pengawa mindahka semua 20 buah ruang bilik ti nyengkaum 68 iku, tembu pukul 9.20 malam.

Category: Berita Iban, Sarawak