Komiti Pengingat Niang JK Wilson ke betuaika Mawan deka direjister

 Email This Post    Print This Post  

(No Ratings Yet)

 Loading ...

KUCHING: Apin lama ke udah, seraban nembiak sekula ke belajar ba Sekula Budu udah ngatur pengawa beserumpu makai lemai ba sebengkah pengerami ke diuluka Menteri Kanan Tan Sri William Mawan Ikom ba sebuah restoren ditu.

Lebuh beserumpu nya, sida ngambi awak numbuhka sebengkah komiti ke dikumbai Komiti Pengingat Niang John Kennedy Wilson tauka (Komiti Pengingat Niang JK Wilson) ti betuaika Mawan nyadi Penyading Penemu, Datuk Dr Jawie Masing (chairman) Liman Numpang (Sapit chairman) Eddie Wilson Danggat (sekretari) enggau lapan iku ex- nembiak sekula Budu ke bukai ti dipilih nyadi kaban komiti.

Komiti tu ditumbuh ngambika tau ngulihka belanja kena nirika tiang pengingat sereta ngemanahka rumah Bungalo niang John Kennedy Wilson.

Niang JK Wilson ke asal ari Scotland datai ke menua tu lalu gawa ba baruh perintah Koloni ari taun 1949 nyadi Prinsipal ba Kolej Pematih Pengajar Batu Lintang.

Lebuh gawa ditu, iya bejalai neresa mayuh kandang menua di Sarawak.

Berengkah ari nya iya lalu nemu pekara ti beguna amat dikena mantu peranak asal menua tu.

Dalam taun 1953, iya lalu minta ngetu nyadi prinsipal di Kuching sereta mutus ati deka mantu peranak menua ke nadai pemansang di Budu, Nanga Budu, Nanga Grenjang enggau Sungai Engkilili di pelilih mit Saratok tauka Nanga Entaih, Nanga Entabai, Nanga Maong sereta Tapang Punggu ba pelilih mit Julau enggau Nanga Kedup sereta Sungai Wak ba pililih mit Pakan.

Raban komiti tu arapka pengawa ngintu pesaka komuniti, iya nya bungalo mit ke digaga ari kayu ti diempu niang Wilson, penengkebang sekim pemansang komuniti ti mungkur nyentuk ke ulu menua Saratok, Julau enggau pelilih mit menua Pakan.

Sida semua setuju ngemanahka bungalo nya sereta nirika tiang pengingat ke digaga ari semin dikena ngingatka pengawa ti udah dipejalaika niang Wilson enggau bala raban iya menya.

Ba tiang pengingat nya mega deka dituliska pesaka ti ditinggalka iya enggau pengawa ti udah dipejalaika iya enggau raban iya kena ngemansangka komuniti.

Komiti JK Wilson Memorial Fund (JKWMF) udah ditumbuh sereta minta direjister enggau Opis Pengerejister Gerempung ngambika sida ulih ngumpul duit dikena melanja projek.

Belanja ke digumpul nya deka ditaruh orang ti udah dipadu sereta dikemendarka komiti nya.

Sida mega deka ngulihka belanja nya nengah pemeri ari ex-nembiak sekula nya, kaban belayan enggau bala pangan ari tiga buah pelilih mit menua ke udah endur niang JK Wilson nya gawa.

Category: Berita Iban, Sarawak