Pengangkun, penegap kaul entara raban bansa pelasar semua pemujur

 Email This Post    Print This Post  

(No Ratings Yet)

 Loading ...

SRI AMAN: Pengangkun sereta penegap kaul ti dikemeran entara genap raban bansa di menua tu pelasar semua pemujur, pemansang sereta pengelikun menua.

Kaban parlimen (MP) sitak Sri Aman Masir Kujat besai bendar pengarap semua pelasar nya deka meruan diterenak dalam penemu rayat ukai semina ba sesebengkah rabanbansa aja tang ba peranak bukai ke bebida jalai pengarap.

Iya mega minta rayat berundingka pengemar enti sema nadai sepenemu tauka enda sama kuing ba mayuh pekara.

“Enti sema nadai pemereti ati tauka penemu ke enda senutuk, menua kitai tau bendar dituntung pengelemi enggau pengerusak ba ekonomi pia mega kaul entara raban bansa menua tu tau ngujungka menua nadai atur ke patut dititih.

“Nya meh batang tuju perintah meransang rayat ngemeranka pemereti ati sereta kaul ke tagap entara sida,” ku iya maya bejadika Panggau Taun Baru China 2013 ke diatur Radio Televisyen Malaysia (RTM) Sri Aman ba Stadium Mini, ditu malam kemari.

Kelimpar ari penyerakup sereta pemereti penemu ke dikemeranka genap raban bansa menua tu, rayat kitai mega bisi pengerindu nyaup orang bukai lalu tu ke ngenegapka kaul entara peranak menua tu.

“Semua raban bansa di menua tu patut bisi penyiru sereta bebasaka raban bansa bukai ba pengidup sida enggau jalai pengarap,” ku iya.

Berebak enggau nya, mayuh atur pengawa bukai dibantai ba panggau nya kelimpah ari pengawa belagu ke diarika penyanyi bansa Iban enggau China lalu bisi mega enchabut tikit benasit.

Bela bisi ngulu atur pengawa nya Pemangku Direktor RTM Sri Aman, Valentino Jefferson Mujon, ketuai opis perintah sereta mensia mayuh.

Category: Berita Iban, Sarawak