Isu NCR udah enda laku agi, ku Masing

 Email This Post    Print This Post  

(No Ratings Yet)

 Loading ...

Rayat nemu tuju konsep nyukat kelingi tanah ti kena nyeliah ari dirampas orang bukai

BELURU: Isu bekaul enggau tanah Hak Adat Bumiputera (NCR) enda laku agi dalam pengawa bepilih besai (PRU) ti deka datai.

Menteri Pemansang Tanah Sarawak, Tan Sri James Jemut Masing madah enti penyakal bepenemu isu NCR agi ulih ‘dijual’ kena ngulihka sukung maya pengawa bepilih ti deka datai, sida ilap.

“Rayat diatu majak tuai runding lalu penemu sida bekaul enggau konsep nyukat kelingi tanah NCR, ba tuju netapka orang beempu tanah rayat tang ukai ngerampas tanah rayat baka ke disebut penyakal.

“Diatu nya ukai agi isu ke ulih diputarbelit nyadika agenda politik penyakal kena ngulihka sukung pengundi,” ku iya.

Masing madah, rayat Sarawak udah sedar pementas perintah Barisan Nasional (BN) mantu nyukat tanah NCR, ngambika tanah nya enda lenyau pia aja.

Bepun ari pengawa nya dipejalai, ku iya, mayuh tanah NCR di serata nengeri tu udah disukat.

“Berindik ari nya, rayat Sarawak ulih beempuka tanah ti tau bendar ngetanka tanah nya ari dirampas orang bukai,” ku iya ke mega Menteri Kanan Sarawak.

Iya andal pengawa nyukat tanah NCR di Sarawak ulih disukat magang dalam kandang dua taun ti deka datai.

Beduduk ari nya, iya minta rayat Sarawak meri kerejasama penuh ngagai Opis Tanah enggau Survei (JTS) kena ngemujurka pengawa nya.

Ku iya, antara penanggul ke suah ditapi sereta ngemuntanka pengawa nyukat tanah NCR iya nya bisi penyarut nyadi bekaul enggau hak ngempu tanah nya.

“Penanggul tu ngemuntanka proses nya lalu perintah enda ulih masuk champur dalam pekara nya,” ku iya.

Dulu agi ari nya, Masing nyuaka dividen sepenyampau RM360,000 ngagai pesereta projek mit ladang kelapa sawit ba Lot 86, Bukit Kisi, ke diatur ba Dewan Masyarakat Bukit Kisi ditu, kemari.

Sama bisi datai ba pengerami nya Sekretari Mendam Opis Pemansang Tanah Sarawak Datu Jaul Samion, Kaban Parlimen Sibuti, Ahmad Lai Bujang enggau Kaban Kunsil Nengeri (ADUN) Lambir, Ripin Lamat.

Category: Berita Iban, Sarawak