Ari baruh NKRA S’wak ulih nyapai pemujur

 Email This Post    Print This Post  

(No Ratings Yet)

 Loading ...

Pengawa nyambung elekterik ke menua pesisir deka teulihka juluk 95 persin, ku Tengah

SERIAN: Kunterik ari baruh Palan Pemujur Besai Bansa (NKRA) menua Sarawak deka ulih dipejalaika magang enda lama agi, lalu entara nya tejapaika 95 persin pengawa nyambung bekal elekterik di menua pesisir.

Pekara nya dipansutka Menteri Perengka Guna Mensia Mayuh Datuk Amar Awang Tengah Ali Hassan, seraya madahka nya begunaka belanja semak RM60 juta.

“Semua kunterik nyengkaum ke agi ari taun 2009 nyentuk ke 2012/2013 deka dikenukuka enda lama agi.

“Atur tu mandangka perintah amat bebendar deka mai pemansang ngagai rayat lebih agi di menua pesisir,” ku iya ba Atur Pengawa Ngepunka Projek Bekal Elektrik Menua Pesisir (BELB) Kampung Baki Tanjung, Seruit, Soh enggau Palah, Bt.27 Jalai Kuching-Serian sereta Tuapekong Jala Palah Batu 29, Samarahan di Kampung Seruit, ditu kemari.

Projek BELB nya ba renggat kedua ti mungkur sepenyampau 101 buah rumah ke peminta baru.

Nitih penerang Awang Tengah ti mega Menteri Pengatur Pemansang Pengeraja Asal enggau Rampa Menua II sereta Menteri Pemansang Industri, nya mega sebagi ari kunterik ari baruh NKRA.

Ku iya, projek nya begunaka ungkus belanja urung RM2.9 juta sereta dipelabaka tembu dalam bulan Jun tu.

Bejaku baru, pejalai projek nya senipak enggau tagit 95 persin rayat menua pesisir disambung bekal elekterik.

Nya alai, iya minta rayat menua pesisir ti kena bungkur projek nya meri kerejasama ngagai perintah dikena nentuka iya ulih dipajalaika enggau manah.

“Dikena bejalaika BELB, begunaka kerejasama ari mensia mayuh (genturung pendiau tauka kampung) laban begunaka alur endur nirika tiang iya.

“Nyadi, nya begunaka sukung ari rayat ti kena bungkur projek nya baka ngemendarka nengah tanah, laban nya mega mai penguntung ngagai sida empu,” ku iya.

Berebak enggau nya, Tengah madah, perintah deka ngemajakka pengawa nyambung bekal elekterik menua pesisir nengeri tu lebih agi kandang menua ulu engtigis, taja pan begunaka ungkus belanja besai.

“Enda ulih diseliah, bisi projek ti begunaka belanja lebih RM100,000 dikena nyambung bekal elekterik ngagai rumah di ulu engtigis. Perintah terus bebendar laban deka meri ubah ti manah ngagai rayat,” ku iya.

Bela bisi ngulu atur pengawa nya kemari, Menteri Muda Perengka Guna Mensia Mayuh Datuk Stephen Rundi, ADUN Muara Tuang Dato Sri Mohammad Ali Mahmud, Setiausaha Tetap Menteri Perengkaguna Mensia Mayuh Ubaidillah Abdul Latif enggau Residen Samarahan Ismail Hanis.

Category: Berita Iban, Sarawak