Kanang bujang berani ti tebilang

 Email This Post    Print This Post  

(No Ratings Yet)

 Loading ...

KUCHING: Temenggung Datuk Kanang anak Langkau udah mayuh meri jasa ngagai menua tu ke alai iya mega seiku bujang berani ke tebilang, ku Panglima 1 Divisyen Majar Jeneral Datuk Mohd Zaki Mokhtar.

Nyadi seiku orang nerima midul ke pemadu tinggi ‘Seri Panglima Gagah Perkasa’ (SP) ke mengkang idup, Pegawai Waran 1 (B) Kanang anak Langkau midang tumu pagi kemari di Sepital Besai Sarawak (HUS) ditu.

“Kitai semua nemu, Kanang sigi seiku bujang berani ke tebilang…pemidang iya deka diasaika semua kelebih agi raban sedadu sereta pia mega rayat nengeri Sarawak.

“Kanang udah mayuh meri jasa ngagai menua maya jeman keruga munsuh komunis lalu pengawa ngubur niang deka diadu enggau basa ke besai,”ku Zaki lebuh dikerandau pemberita ba sebengkah pengerami di Bau kemari.

Ba kaul ke sama, chairman Parti Keadilan Rakyat (PKR) Nengeri Baru Bian ngasaika pemidang niang Kanang siti pengelenyau ti besai ngagai menua kelebih agi ngagai rayat Sarawak.

Iya ngakun niang sigi seiku bujang berani ti tebilang lalu perchaya mayuh agi raban tauka bujang berani bukai patut mega diberi tanda basa lalu dikenang ketegal ti udah betempuh ngelaban komunis ngenanka menua.

Iya mega ngarapka, bujang berani bukai dalam sedadu bela nerima bantu RM3,000 ari perintah lalu nadai seiku ditinggal dalam program bantu nya.

Ku iya, bujang berani ke bukai tu bela udah berambunka nyawa ngalaban komunis lalu nentuka menua teulihka kuasa merintah diri.

Presiden Gerempung Ex-sedadu Malaysia (Sarawak) Spencer Birai madahka niang Kanang udah nyadi ikon ngagai raban veteran sedadu bukai.

“Pemidang Kanang siti pengerugi ngagai kitai di Malaysia ketegal iya semina seiku orang nerima Seri Panglima Gagah Perkasa (SP) ke mengkang idup,” ku Spencer.

Niang Kanang deka dikubur ba Pendam Bujang Berani  Kuching ditu lalu deka diatur enggau basa ti besai.

Category: Berita Iban, Sarawak