Polis ngelalau mensia mayuh enda bejalaika aktiviti ngelumbung emas enggau nadai pemendar

 Email This Post    Print This Post  

(No Ratings Yet)

 Loading ...

BAU: Polis bebendar ngelalau sereta ngingatka orang mayuh ngambika enda bejalaika aktiviti ngelumbung emas enggau nadai pemendar di Gunung Tabai, kena nyeliahka pekara ti enda manah nyadi baru.

Nitihku pemangku Kepala Polis Pelilih Menua (KPD) ASP Chan Shun Sing, runding ti deka bulih duit jampat sereta muntang patut dibuai laban pengawa nya ngeruga pengelikun, bisi tiga kes bebadi nabanka nyawa dirikut ketegal kena timbuk tanah ba endur nya.

“Pengudah tiga kes kena timbuk tanah ba Gunung Tabai, kami bejalaika pengawa matau ba endur nya tiap malam.

“Asil iya, kediatu kami mujur nangkap 10 iku laban tama belalai ngagai endur nya lalu sida ke kena tangkap nya ari raban ruang bilik ke kurang ba penatai pemisi,” ku iya maya baum pengarang berita, di Indu Opis Polis Pelilih Menua (IPD) Bau, ditu, kemari.

Cham madahka kena mutarka pekara nya kes dianjung ngagai opis ti patut.

Atur ke ulih dikena baka dibaruh Seksyen 447 ba kes  nyerubuh jenayah laban tama belalai ngagai endur lumbung sereta ulih diukum enam bulan jul tauka diukum mata duit RM3,000.

Sida mega ulih didawa nengah Ordinan Kesalahan Kecil, seseiku orang enda tau ba endur ke ditangang tauka dikeempu seseiku orang, ke ulih diukum jil tiga bulan.

Ba pekara bukai, Chan madahka naka kediatu bisi 10 kes bebadi nabanka nyawa dirikut ba pelilih menua nya enti dibandingka enggau 12 kes timpuh sama taun nyin kemari.

Lalu penyampau saman iya nya bisi 2,670 bengkah dibandingka enggau 2,059 bengkah taun nyin kemari.

“Kitai udah chakah ba pengawa nagang penusah nyadi taun tu baka suah ngatur pengawa nyekat jalai, kelimpah mereka perengka pengangkut,” ku iya.

Mungkur semua pekara ku iya, tikas jenayah ba kandang Bau bisi nurun sepenyampau 69 kes dirikut berengkah Januari ngagai November taun tu, dibandingka enggau timpuh ke sama taun nyin kemari bisi 73 kes.

Bekaul kes dadah, Chan madahka bisi 47 keretas pansik kes dibuka dibandingka 39 aja taun nyin kemari.

Category: Berita Iban, Sarawak