Anak patu balu diberi baucer bantu

 Email This Post    Print This Post  

(No Ratings Yet)

 Loading ...

KPDNKK merambu ngemasukka raban tu dalam lis penerima

MIRI: Opis Menteri Dagang Dalam Nengeri, Gerempung Kerejasama enggau Pekara Bebeli Barang (KPDNKK) ditu merambu deka ngemasukka raban anak patu balu dalam lis penerima baucer bantu meli kereban sekula.

Kediatu, bantu nya ke penyampau RM100 ari KPDNKK semina diberi ngagai anak indai tunggal ke ngerejister enggau gerempung aja.

Sapit Kepala Pampang KPDNKK Miri, Awang Ismail Awang Madian madahka piak sida diatu benung mansik kereban guna enggau pemayuh anak patu balu ke agi besekula sereta dibaruh jaga gerempung di bagi menua tu, ngambika dipasuk dalam lis penerima baucer bantu.

“Bantu nya ungkup belanja ari opis menteri ke tiap pampang KPDNKK ngambika diagih kena mantu raban ti beguna baka indai tunggal, kena meli kereban sekula anak sida,” ku iya.

Ku iya, pampang KPDNKK Miri diungkupka RM20,000 lalu ari penyampau nya RM16,000 diagih ngagai Gerempung Indai Tunggal Bagi Menua Miri nengah chara meri baucer 160 limpir, lalu ke tiap limpir RM100.

“Nya diungkup ngagai 160 iku anak gerempung ke agi belajar ba sekula primari aja ke beumur tujuh ngagai 12 taun, ke seiku (anak)nerima RM100,” ku iya.

Awang Ismail madahka pekara nya ngagai pemberita ditu kemari pengudah nyuaka baucer bantu RM100 ari KPDNKK nyerumba bejadika ‘Kempen Kembali Ke Sekolah’ ti diatur KPDNKK Miri ba Pasar Raya E-Mart di Tudan ditu, kemari.

Berebak enggau nya iya mega ngelalau indai tunggal nya ngambika ngena bantu nya kena meli kereban sekula anak sida.

Indai tunggal pengereja pengawa opis perintah kemari mega nerima bonus, iya ngelalau sida landik melanja (meli kereban sekula) enggau ngelimat duit sereta ngemeratka pelajar anak dulu.

Kelimpah ari nya, chairperson Gerempung Indai Tunggal Bagi Menua Miri, Noriah Hatta madah ngagai pemberita, bantu nya semina diberi ngagai indai tunggal ke ngerejister enggau gerempung nya aja.

“Nya alai kaban gerempung ti enda ulih nerima baucer bantu pagi tu (kemari), sida ulih betemu enggau aku datai ngagai opis ngambi baucer nya,” ku iya.

Noriah mega ngelalau indai tunggal ke bedau ngerijester enggau gerempung patut ngerejister diri laban mayuh bantu ke disedia sereta ulih diberi.

“Aku minta indai tunggal ke bedau ngerejister datai ngerejister diri lebih agi ke bisi anak besekula ngambika sida ulih dibantu seraya ulih ngurangka pemerat melanja sekula anak sida,” ku iya.

Penerang silik pasal deka nyadi kaban gerempung tau betelefon ngagai Noriah ba lumur 01116084007.

Category: Berita Iban, Sarawak