Patut diambi dalam tiga taun, penalti diberi enti enda berat ke pekara nya

KUCHING: Opis Ngerijista Menua (JPN) berunding deka ngeletakka ukum penalti enti kad pengelala MyKad ke udah tembu digaga tang diambi ari opis udah abis timpuh tiga taun, belabuh ari maya orang mayuh ke ngaga MyKad nya.Sapit Menteri Dalam Menua, Datuk Wira Abu Seman Yusop madah kebuah perintah ngerunding deka ngeletak ke chaj penalti nya, laban ku iya, enti kad pengelala enda diambi, iya deka ngerampit kos ngaga dokumen perintah nya.

“Nyangka perintah patut mansik baru pasal penalti tauka ukum tu awakka barang sapa ke lalu bedau ngambi MyKad tauka MyKid sida iya udah bekau timpuh tiga taun ke diberi nya, patut diletak tauka ditunggu chaj penalti.

“Kebuah pia, ngambika mayuh agi orang nemu sereta sedar pasal pemerat dokumen tu. Tu entara chara ke deka dikena kami jemah ila kelimpah ari JPN ngena wakil rayat, tuai rumah enggau kampung tauka pegawai pelilih menua nesau bala mayuh ngasuh sida iya ngambi kad pengelala ke udah tembu digaga,” ku iya.

Abu Seman madah munyi nya, lebuh mandingka menua Sarawak ke bisi bempu kad pengelala ari orang mayuh ke bedau diambi, sama rata baka menua bukai ba Malaysia tu.

Iya madahka, enti MyKad tauka dokumen bukai ke bisi dipinta sereta udah tembu tang enda diambi orang ke ngaga dokumen nya, iya deka mengkang disimpan opis nya dalam kandang tiga taun lalu dikategori nyadi ‘dokumen ke enda diambi’.

Naka ke diatu penyampau bisi 18,498 iti MyKad sereta 3,266 iti MyKid ke udah tembu lalu bedau diambi ari opis nya diserata menua Sarawak tu.

“Enti deka manding entara nengeri enggau menua pesisir, nadai penanggul bekait enggau ngerijista sereta ngaga dokumen tu, laban kami bisi ‘unit bergerak’ ke deka mansang ngagai sitak menua ke jauh ari nengeri. Tang enti dokumen tu udah tembu dalam kandang 30 hari berindik ari hari sida ke ngaga nya, sida iya bisi 30 hari deka ngambi dikumen ke udah tembu….Nadai penanggul datai ke Kuching laban timpuh 30 hari nya kira ke chukup kena sida iya ngemutarka pejalai sida iya kitu,” ku iya.

Iya madah munyi tu ba aum media udah ke nemuai ngagai Opis JPN ditu kemari.

Abu Seman, pansik pasal penalti benung digaga lalu iya dipelaba deka begunaka timpuh ke panjai sebedau dikemendarka perintah lalu tau dikena.

“Pansik pekara tu ukai pekara ke muntang laban iya begunaka pemendar ari Indu Opis, ari kabinet, ketegal pekara tu  besangkut paut enggau rayat, lalu ni naka penyampau penalti ke patut diletak.

“Semua kos kad pengelala ke enda diambi bisi bagi ba kos perintah. Kira ke siti kos kad pengelala ke enda diambi dikira RM36 lalu penyampau tu enti dikali tauka darab enggau pemayuh kad pengelala nitihka pupu rata ke enda diambi ba menua tu bisi dalam urung 15,000 iti, lalu ditambah ka baru enggau 14 nengeri ba Malaysia tu, nya meh penyampau kos perintah ke dikena lebuh kad pengelala nya enda diambi,” ku iya.

Abu Seman madah lebuh penalti tu diberi kelala ila, iya nyauka baka ngechaj penalti ngagai orang ke nyau kad pengelala.

“Enti keterubah iya lenyau, penyampau caj iya nya RM100, enti kedua kali lenyau patut dicaj RM200 lalu dichampur enggau kos kena proses dokumen nya, RM10 siti,” ku iya.

Siti ari kebuah mayuh kad pengelala enda diambi iya nya ketegal orang mayuh ke enggai ibuh pasal pemerat dokumen tu ke sida iya empu.

“Ulah mensia mayuh ke enggai ibuh ke selalu madah “nadai ngawa” pasal dokumen berat sida iya empu ngasuh pengawa baka tu nyau majak betimbun ba opis JPN. Semadi deka begunaka kad pengelala baru belabuh ka begiga ke nya,” ku iya bejaku baru.

Kelimpah ari nya mega, iya madahka mayuh kemplin diterima ari rayat kelebih agi ba sitak Sarawak ke madahka laun ngerijista surat beranak ketegal selalu mayuh penanggul.

“Sida ke madah nyau beribu laun ngerejista surat beranak ke enda ulih dikemutar ulih opis JPN siti pekara ke nadai pemun. Laban udah mayuh penanggul baka tu udah dikemutarka kelebih agi ke bekait enggau sida ke diau ba menua pesisir menua tu. Tambah kami pan udah bisi ‘unit bergerak’ ke dikena kelebih agi ba pengawa ngemutarka penanggul laun rejista surat beranak tauka ngaga MyKad.

“Tang pengelaun nya ukai ketegal opis JPN deka ngelaunka pengawa baka nya tang ketegal dokumen ke diberi enda chukup,” ku iya.

Sama bisi datai ba aum media nya, iya nya Ketuai Besai Opis Ngerijista Menua Datu Abu Bakar Mat, Sapit Tuai Pegawai JPN Malaysia Wahab Mohd Yasin, Kepala Polis Menua Dato Mohmad Salleh enggau Ketuai Besai Opis Imigresen Menua Sarawak Datu Robert Lian.