KUCHING: Atur ke terit deka diambi ba sida ke bejalaika pengawa dagang palan alai nginjau duit enggau pajak gadai enti sida bisi ditemu bejalaika pengawa dagang tu ngena chara ke salah iya nya ngereja pengawa nadai belisin.Ketuai Penguat Kuasa Pengawa Meri Lun enggau Pajak Gadai, Opis Menteri Rumah enggau Perintah Menua (KPKT) Sarawak, Superintenden Ng Ah Lek madahka asil ari pansik opis nya, sida iya bisi nemu pengawa dagang pajak gadai ba menua tu sigi mayuh enti deka dibanding enggau ngelun duit di pinta nengah Opis Menteri Rumah enggau Perintah Menua (Kementerian Perumahan dan Kerajaan Tempatan).

“Ba menua Sarawak pengawa pajak gadai sigi mayuh taja pan enda serius. Orang ke bejalaika pengawa dagang palan ngelun duit pan bisi mega bejalaika pengawa pajak gadai.

“Kami udah bejalaika pengawa pansik sereta meresa sekeda kedai tauka opis ke bejalaika pengawa tu lalu pengawa bakatu deka terus dikereja kami kelimpah ari mantau ulah sida iya ba serata menua Sarawak,” ku iya madah ngagai bala pengarang berita ba opis iya ditu, kemari.

Ng madah baru, enti orang mayuh bisi penerang pasal palan alai nginjau duit ke enda belisin, dia sida iya tau madah pasal pekara tu ngagai opis nya.

“Kami ulih nulung orang mayuh bejalaika pengawa nagang palan alai nginjau duit enda belisin terus nyadi ba menua tu. Ba menua Sarawak, lisin palan alai nginjau duit dikeluarka ulih Opis Residen ba tiap iti sitak. Taja pan pengawa mansik sereta meresa sigi batang pengawa sida iya tang lebuh sida iya minta bantu kami, kami deka mantu sida iya, laban opis kami pan bisi kuasa,” ku iya.

Ng madahka pengawa ngeluarka lisin palan alai nginjau duit sigi dipegai opis residen ba tiap sitak laban semina lisin tu aja ti dipegai baruh opis nya, tang lisin pajak gadai dikeluarka opis menteri KPKT.

“Enti orang mayuh bisi kemplin pasal palan alai nginjau duit, sida pan tau datai ngagai opis kami, nyangka bungai nya kelalu mar kini, tau diripot ngagai kami. Kami deka ngambi atur tu tauka kami nyerah pekara nya ngagai Opis Residen.

“Kami ulih mantu laban opis kami pan bisi kuasa laban deka beratika semua pengawa baka tu patut bisi lisin lalu nitihka atur ke udah ditetapka,” ku iya.

Ng madah ba pekara pajak gadai, enti iya enda ditagang (kelebih agi ke nadai belisin) iya deka mantai mayuh agi penanggul kelebih agi kedai pajak gadai ke mayuh endar udah dibuka ba nengeri besai baka Kuching, Sibu, Bintulu enggau Miri.

“Tang enti sida tu agi deka neruska pengawa pajak gadai nadai belisin, sida iya deka betunga enggau kami tauka ngagai kut ke deka ngambi atur ba sida iya.

Ng madahka undang-undang pasal palan alai nginjau duit enggau pajak gadai dua iti pekara ke enda sebaka.

“Genteran Tusun ukum ke palan alai nginjau duit sigi udah di kena ari taun 1951 lalu iya semina dikerembai ngagai Sabah enggau Sarawak kena 1 Januari 2008. Maya nya semina ba Semenanjung Malaysia ke ngena atur tu.

“Lalu atur undang-undang pajak gadai digaga ba taun 1972 ti dikena ba serata menua tu. Diatu opis kami ba Sarawak lebih agi beratika pengawa pajak gadai laban penyalah nya sigi amat serius,” ku iya.

Ba baruh genteran tusun ukum Seksyen 7(2) 1972, enti bisi ditemu orang bejalaika pengawa pajak gadai nadai belisin, sida deka diukum pengabis mimit RM20,000, pengabis mayuh RM100,000 tauka kena jil enda lebih ari lima taun tauka dua iti ukum nya sekali, enti ditemu salah.

Penyalah kedua kali enti ditemu bisi ngereja pengawa pajak gadai kelimpah ari diukum sereta kena jil, orang nya pan deka diberi ukum sipat kena rutan, enti ditemu salah ngereja pengawa nya.

“Opis kami mega meri jaku tangkan ngagai orang mayuh enda ngasuh sida iya meli surat pajak gadai. Ambika chunto, enti bisi kedai pajak gadai ke belisin nerima utai ke digadai kita, kedai nya deka meri surat pajak gadai. Tu pan nyadi penyalah enti meli surat pajak gadai enggau rega ke tinggi.

“Penyalah tu tau didawa ba baruh Genteran Tusun Ukum Seksyen 41 ba baruh Akta Pajak Gadai 1972 sereta deka diukum enda lebih ari RM20,000, kena jil 12 bulan tauka kedua-dua iti ukum nya sekali enti bisi ditemu salah,” ku iya.

Orang ke ngerijista bejalaika pengawa dagang pajak gadai semina mayar RM25 ngagai Opis Hasil (tu ukai lisin tang ngerijista pengawa dagang) sereta mayar yuran lisin setaun dalam penyampau RM24,000 setaun.

Lebuh ditanya pemayuh kedai bansa tu ke bisi ditemu ba menua tu, Ng madahka: “Kami udah ngelala sekeda kedai ke nyual emas, kedai pajak gadai, enggau palan alai minjau duit belisin bejalaika pengawa tu sigi mayuh ba Sarawak. Tau dikira ratus,” ku iya.

Nya alai, ku Ng, iya ngasuh kedai ke bisi pengawa dagang baka tu minta lisin bejalaika pengawa tu ngagai opis menteri.

“Lisin kena muka palan alai minjau duit sereta pajak gadai tau dipinta ba opis menteri KPKT ba baruh perintah besai. Lalu penerang ke silik pasal pekara tu tau dipeda nengah ruai siber www.kpkt.gov.my ~ tekan ‘jabatan/bahagian pemberi pinjam wang dan pajak gadai’ tauka betalipaun enggau opis menteri nya ba lumur talipaun 03-20947033 tauka opis nya ba pampang Kuching 082-258200,” ku iya madah baru.