Batang Lassa di Mukah enggau Taman Negara Kampung Paya Bakau di Limbang udah dipansik silik

KUCHING: Dua palan kandang menua ba tebing tasik sereta sungai ba menua tu deka ‘ditembang’ tauka diwarta nyadika Kampung Galau Kayu Bakau kena jaga sereta ngetanka kampung ngambika tau terus meri penguntung ngagai menua tu jemah ila.Sapit Seketari Mendam Opis Pengatur Pemansang Pengeraja Asal, Datu Len Talif Salleh madahka dua iti palan ke deka ‘ditembang’ perintah iya nya Taman Negara Batang Lassa ba Mukah enggau Taman Negara Kayu Paya Bakau ba Limbang.

Kampung galau dua iti tu ila enti iya udah ‘ditembang’, dia iya enda tau dikachau, enda tau alai nebang kayu, alai ngasu sereta pengawa bukai ke nyalah atur tauka undang-undang perintah menua, laban iya deka diintu sereta dikemangsangka perintah ngelikunka kampung sereta jelu siga ke nguan kampung kayu bakau sebelah tebing tasik.

Talif madahka pengawa ke ngembang dua iti palan tu disadang deka dikereja abis laun ba ujung taun siti nyin ila.

“Dua iti kandang menua tu deka ‘ditempang’ nyadika Kampung Kayu Bakau ba menua tu, nyadi pengawa tu nyangka deka diadu udah pengawa mansik bekaul enggau pekara tu dipejalaika, tembu ba  taun 2010,” ku iya madah baru.

Talif mansutka penerang tu ba aum pengarang berita ti diatur udah bekau pengerami ngelanchar ke Seminar Ngetankan Kampung Tebing Tasik Menua 2009 ba siti hotel ke tebilang ditu kemari.

Seminarnya dipenyadika Menteri Muda Pengatur Pemansang Pengeraja Asal, Mohd Naroden Majais ti ngarika Menteri Pengatur Pemansang Pengeraja Asal, Datuk Amar Awang Tengah Ali Hassan.

Sama bela bisi datai enggau ngulu aum pengarang berita tu iya nya, Kepala Pengarah Kampung Malaysia, Datuk Razani Ujang sereta Sapit Pengarah Opis Kampung Sarawak, Ali Usop.

Naka kediatu Sarawak udah ngembuan tiga iti kandang menua ti udah dipejadi ke kampung galau kayu paya bakau. Tiga iti menua tu iya nya Taman Negara Paya Kuching, Taman Negara Kayu Bakau Rajang di Mukah enggau Taman Santuari Jelu Siga di Sibuti, Miri.

Taman Negara Batang Lassa, Mukah mungkur kandang menua pemesai 22,000 hektar lalu Taman Negara Kayu Paya Bakau Limbang 9,374 hektar.

“Pengawa pemasik ti dipejalaika ba dua iti kandang menua baru tu udah belabuh ari 2003 suba, lalu diatu pengawanya udah datang ba pengujung iya lalu aku arapka dua iti kandang menua tu ulih ‘ditembang’ ba taun siti nyin ila,” ku Talif.

Dulu agi ari tu, lebuh mantai ke jaku lalau iya maya pengerami tadi, Talif nyemetak endar madahka perintah menua sigi bebendar deka ngintu pengelikun kampung ba kandang tebing tasik.

Arinya mayuh bendar udah program nanam kayu bakau enggau bansa kayu bukai udah dikereja kena ngetan lalu ngemansangka kandang kampung ba tebing tasik.

“Naka kediatu perintah udah naman 450,000 batang kayu bakau enggau kayu bukai ba kandang menua tabing tasik enggau tebing sungai ti mungkur kandang tanah pemesai 185 hektar,” ku iya.

Talif madah perintah mega lalu deka ngereja pengawa nanam kayu ke baka tu ba maya ti deka datai ila.

“Pengawa tu deka terus dikereja ngambika kena nyaga kampung ba tebing tasik sereta enggau tebing sungai,” ku iya.