KAPIT: Anang mudah tekuing ati laban jaku enggau danji bala sida penyakal tang rayat patut bediiri negi ngembar bala ketuai parti ari perintah Barisan Nasional (BN). Maya bepilih besai Menua tu ila, anang enda nyukung chalun BN.Nya meh jaku lalau ari Sekiteri Politik ka Kepala Menteri Sarawak Daniel Jubang Datuk Kenneth Kanyan lebuh ke bejaku bejadika Pengerami Beteleba sereta Nerang Isu Kemaya haritu ba Dewan Serbaguna Sri Baleh malam hari Lima.

Pengerami nya diatur ulih Opis Pekara Nyemetak (Jasa) Kapit.

Sama bis datai ba pengerami nya Residen Dahim Nadot, Sapit Residen (Sosial), Mohd Ikhmal Abdullah, SAO Bidah Lujah ke ngarika tuan DO, pengari Jasa Menua

Petter Segie, Kunsilor Tapah Ata, Penulung Tukang Wang EXCO Nembiak PBB Sarawak Alvin Rungga James Jimbon, bala ketuai raban bansa baka Pemancha Badi Nuawi, Pengulu Satem Morshiden, Pengulu Jampi Rawing, Pengulu Enggin Nyipa, bala tuai rumah sereta enggau urung 200 iku bala bukai ke diambi datai kia.

Nitih padah Jubang, perintah BN diatu endang siru pasal penanggul enggau pengelantang pendiau rayat. BN tu nyengkaum rayat ari mayuh pupu raban bansa ke tegal ngembar iya sereta mega ngarika mayuh bengkah raban bansa di menua Malaysia tu.

“Taja pan nyadi siti gempung mayuh parti, tang iya tetap kuat, beserakup sereta entap pendiau dalam pengawa ngadu pengidup bala rayat mayuh,” ku Jubang nerang.

Ngenang atur bepilih besai Menua ti deka datai enda lama agi, sapit ketuai nembiak PBB Sentral  (Indu Opis) sereta mega ketuai nembiak PBB N.56 Baleh nya madah, endang udah teleba dipeda kitai bala parti penyakal deka berengkah enggau ulah sida belicha lalu nabur danji manis ngagai rayat.

“Semua kitai patut bediri negi ngembar sereta nyukung pegai ketuai kitai baka Kepala Sarawak Pehin Sri Abdul Taib Mahmud seduai Perdana Menteri Malaysia Datuk Seri Najib Tun Razak kena nentuka program pemansang ungkup rayat mayuh nadai pungkang tang terus besambung, terus dikenataika baka ke ngelamatu. Lalu ka tambah nya, kitai deka ensepi pemalat pemansang beduduk ari projek pemansang baruh kandang menua bungkur Koridor Kuasa Tau Dikena Baru Sarawak (Score) baka atur ngaga infrastruktur jalai alun enggaiu sekeda projek bukai ke ngemajuka agi ekonomi rayat di sitak Kapit,” ku Jubang.

Siti ari pemansang tu nya atur ngaga jalai alun nyambung Tatau-Sangan-Merit-Tunoh enggau  jalai alun rayat ari Kanowit-Ng Poi-Ng Ngemah-Song-Kapit ke ditagaka digaga berengkah ari taun dudi tu ila.

“Keba enti udah tembu jalai penyambung nya ila, rayat di sitak menua tu ila deka mudah agi kulu kili kelimpah ari ulih muka mayuh tanah baru alai betanam betupi ke nguntungka rayat mayuh ila. Pekara tu mega deka ngangkatka manah agi tikas ekonomi enggau pengidup rayat di menua pesisir ditu jemah ila,” ku iya.

Ngenang pasal penanggul bekal karan ke semampai ninggang bala rayat mayuh di pasar Kapit kenyau ari lebih sebulan ke udah, Jubang madah pekara nya nyadi beduduk ari injin api ke mekal karan nya enda tebekalka agi peminta ke majak betambah tinggi, nya alai ngujungka ‘current overload’.

Reti nya, ku iya, bekal karan ke bisi diatu enda ulih nampung agi peminta bala pengguna mayuh. Diatu kandang genturung berumah baru baka kulat ke tumbuh bekau ujan, kelebih agi kenyau ari berapa taun ke udah enda kira iya ba nengeri tauka menua ulu.