Tang sekula enda mujur nanggung pengawa nya enti nadai sukung ari PIBG enggau raban bansa

SRI AMAN: Sekula endang sigi besai  tanggung pengawa dalam ngasuh nyadi nyata batang peneka menua Malaysia tu awakka nyadi alai endur bala nembiak ngeraup ngulihka penemu ke manah kena ngasilka mayuh nembiak mujur lalu mantu dalam agenda pemansang menua.Tang taja pia, pengawa enggau pemendar ngereja pengawa lebu ngapa enti nadai sukung sereta kerejasama ti nadai bebelah bagi ari semua urang ba sekula nyengkaum bala sida pengajar, bala kaban Gerempung Apai Indai Nembiak enggau Pengajar (PIBG) sereta raban bansa ba kelingi menua dia, ku Menteri Muda Pemansang Tanah Datuk Francis Harden Hollis.

Iya madah, dalam abad ke-21 tu, endang mayuh pekara disadang nyadi, kelebih agi beserimbai enggau pemansang dalam teknoloji pemadah enggau komunikasi (ICT) ke ngadaka fenomena  globalisasi ‘Dunya Nadai Sempadan’.

“Ngambika kitai terus ensepi pemujur ti bejalai terus menerus dalam sebelah dunya global ke balat enchabar tu, kitai enda tau enda  nyendia sereta nyikap bala nembiak diatu enggau penemu, pengelandik tinggi ke inovatif, ngembuan ulah ti manah sereta mereti pendiau awakka nyungkak pemansang nembiak rebak baru diatu nangkup ubah dunya kemaya haritu enggau sikar sereta efektif,” ku iya nibar jaku.

Harden ke mega Kaban Kunsil Nengeri mansutka jaku nya lebuh bejadika Pengerami Nyua Setipikit enggau Prais Sekula Kebangsaan (SK) Kem Pakit, Sri Aman ba Dewan

Perkasa sekula nya ditu hari Enam tu tadi.

Ku iya, kena ngemansangka agi penemu, penauu sereta pengelandik nembiak dalam komunikasi, kelebih agi dalam jaku Inglis lalu ngansah tajam agi bala nembiak ngulihka mayuh bengkah pengelandik ke manah nya endang dijadika kemeran tauka agenda lumur satu ungkup semua sekula.

Taja pia, ku iya, penemu ti mayuh enggau mayuh bengkah pengelandik ti dikembuan urang siku-siku nya nadai guna enti iya nadai ngembuan ulah enggau penemu sereta runding ti manah.  Pekara bakatu meh ke besai endur guna kena nentuka genap iku nembiak nya bisi disiplin lalu penuh kemeran dalam nempuh sereta nangkup chabar ke udah disebut tadi.

Menteri Muda nya nambah madah pemansang mudal mensia tu patut diperambu enggau silik, manah lalu ngena semua pekara nya dipeda ari semua sukut segi sereta integrated. Semua penauu, pengelandik nembiak nya mesti ulih dikemansangka enggau silik sereta efektif.

“Semua pekara tu endang bejalai terus sereta besenutuk enggau Atur Mungkal Pelin Besai Pemansang Pelajar (PIPP) ulij Perdana Menteri dalam bulan  Januari 1997,” ku iya keran madah.

“Kitai enggai mina ngada, nempa nembiak gian macha bup ke mina nyulut dalam akademik aja, tang patut iya, generasi tauka nembiak rebak baru nya nadai  timpang dalam pekara fisikal, mental enggau intelektual, bisi disipilin diri empu ke tinggi, taluk tauka patriotik ke menua, nadai ulah individualistik tang endang urang ke ulih sama berakp enggau ngemansangka individu dalam raban bansa.

“Pemendar ngereja pengawa tu sepenutuk enggau dua ari enam teras strategik PIPP ke nyadai batang katalis ungkup kena perintah nyapai status menua mansang datai ba taun 2020 ila,” ku iya nampung jaku.

Nya alai, enti bisi gandin enggau kaul ti rapit sereta tegut entara sekula enggau PIBG, sekula nya tetap lebih bisi peransang tulang dalam pengawa nyungkak manah agi japai tikas pemujur iya  dalam akademik sereta mega dalam kokurikulum. Kaul enggau gempung ati ke manah sereta bala apai indai ke kiruhka pemansang pelajar bala anak sida nya deka mantu ngangkatka gaya enggau peneka belajar ti kondunsif sereta pulai ka penguntung semua bala nembiak ba sekula nya, ku iya agi.

Sama bisi datai ba pengerami nya ketuai merintah  Batalion 13 Rejimen Sedadu Melayu Diraja (RAMD), Mohamad Fadzli Mat Idris, sapit ketuai merintah  Batalion ke-2 Sedadu Wataniah Jamil Salim, ketuai opis pelajar Sri Aman  Walter Lamat Kiyai, kepala pengajar Mohd Nasir bin Narawi, bala pengajar enggau bala apai indai nembiak sereta bala nembiak dia empu.

Dulu ari tu kena 20 Ogos 2009 tu tadi Harden mega bisi minta bala rayat, kelebih agi bala rumah panjai enggau kampung, anang enda keran beratka  pelajar sekula bala anak sida.

Maya nya, iya ngansak bala kaban Komiti Pemansang enggau Pengelikun Pendiau (JKKK) dipinta enda tau enda ngemeranka pelajar sekula anak sida kena ngemudahka agi atur perintah ke deka ngasilka raban bala orang menua tu empu ke bisi pengelandik.

Ku Harden madah, genap iti JKKK di menua tu ukai mina fokus ngagai pemansang aja tang mega beratka pemansang pelajar bala rebak baru kemaya haritu.

“Nembiak rebak baru kemaya haritu enda ulih enda disikap enggau penemu ti chukup sebedau kitai nyingkang ngagai era 2020…laban enti nadai bekal penemu ti chukup sida deka timpang dalam semekih ba dunya makit pengawa enggau semekih bukai.

“Senentang tu, ngena bendar genap iti JKKK ba semua kampung enggau rumah panjai bejalaika tanggung pengawa sida merambu langgur pelin timpuh enda lama enggau lama pasal pelajar sekula laban bala nembiak rebak baru nya aset besai rega menua tu ke mega dudi ila mega tampuk kuasa enggau ulu duku matak jalai nyadi tuai menua tu,” ku iya.

Menteri muda nya mansutka jaku tu lebuh bejaku ba Pengerami Tuai Begulai Sejalai enggau Rayat ari atur Komiti Pemansang enggau Pengelikun  (JKKK) Rumah Ujang Langgong, Kampung Terusan, Sri Aman ditu maya nya.

Ku iya, menua tu balat endar beguna raban nembiak ke pandai dalam ngemansangka menua tu ke alai datai ba taun 2010 tu ila, genap iti ruang bilik dikarapka udah ulih ngasilka abis nadai siku graduat.

“Enti apai indai enda meri awak pelajar ti chukup ngagai bala anak sida, JKKK mega tau dikumbai enda mujur bejalaika tanggung pengawa sida, lalu enti pia, kitai nadai ulih nyalahka bala anak kitai ke terus tinggal jauh di belakang, laban kitai empu ti patut bejalaika tanggung pengawa tang enda nitihka nya,” ku iya sereta nambah madah bala apai indai enggau JKKK patut begembar enggau pangan diri berakup dalam pengawa nyendiaka pelajar sekula ti kondusif ngagai bala anak sida ba rumah panjai tauka kampung nya.