Penyampau 28 buah rumah panjai udah nerima lun ba taun 2009, pia ku Abang Johari

KUCHING: Ungkup ke diterima ari Perintah Besai ke diungkup kena lun rumah panjai ti udah di kemendarka ba taun 2009 iya nya dalam urung RM6,170,000 juta ke mungkur 28 buah rumah panjai tauka 617 buah pintu.Kelimpah ari nya mega ku Menteri Pengawa Rumah Datuk Amar Abang Johari Tun Openg madah ba taun 2008 mega bisi diungkup dalam urung RM10 juta, ke udah diterima ari Perintah Besai.

“Ari penyampau ti udah dikemendarka, lun ti udah dikemendarka ngagai sida ke minta lun tu bisi dalam penyampau RM9,240,000 ke ngungkup ngagai 35 buah rumah panjai tauka 924 pintu. Laluh nya dibai ngagai taun 2009.

“Laluh ari nya tadi udah dipeling kena ngemutarka rumah panjai mudel baru,” ku iya lebuh nyaut tanya ari Kaban Kunsil Nengeri (ADUN) Bukit Begunan Mong Dagang ba Aum kedua kena Renggat Keempat Aum Kunsil Nengeri (DUN) Ke-16 ditu, kemari.

Projek ngaga rumah baru nya mega nyengkaum ngaga 145 iti rumah panjai ke ngena belanja RM6.38 juta ba alai orang mayuh diau ba Seduku Baru enggau Batang Lupar sereta lapan iti rumah panjai enggau tiap iti nya bisi ngembuan 20 pintu ke ngena belanja RM6.4 juta ba lapan iti menua pelilih ba menua tu.

Sebedau nya ba bulan Mac taun tu tadi, Sapit Presiden Parti Pesaka Bumiputera Bersatu (PBB) enggau Kaban Kunsil Nengeri (ADUN) Satok nya mega bisi madah bisi pelin deka ngeluarka geran ngagai sida ke bempu rumah panjai.

“Taja pia, semua pekara tu agi deka dibai ngagai aum dulu,” ku iya tang nadai nyebut enggau silik agi pasal pekara nya laban maya nya naka ni pemayuh ungkup nya bedau di padah lebuh nya.

Opis Menteri Pengawa Rumah mega deka ngatur ngaga rumah panjai ngena konsep muden ngena teknologi IBS (Industrialised Building System) awakka bisi pengelikun enggau pengelantang ke manah agi.

Abang Johari madah, iya deka bejuraika pasal nya enggau silik agi enggau sekeda opis bukai nyengkaum majlis adat bekait enggau pelin ngaga rumah panjai nitihka konsep baru nya.

“Ngena tekonologi IBS dipelaba manah ba pengawa ngaga rumah panjai konsep muden laban kelimpah ari nya, iya ulih ngelantangka agi sida ke diau ba rumah panjai lalu iya mega betuju kena ngurangka agi kes angus ke selalu nyadi ba rumah panjai menua tu,” ku iya.