KUCHING: Larry Sng ke di keluarka ari Parti Rakyat Sarawak (PRS) bekau krisis ka nyadi dalam parti nya ka udah, lalu nadai agi begempung enggau sebarang parti komponen Barisan Nasional (BN) agi mengkang megai pengawa ba Kabinet Menua ke baru.Larry dipadu baru nyadi Menteri Muda ba Opis Kepala Menteri enggau Menteri Muda Pemansang Industri (Perancangan).

Kepala Menteri, Pehin Sri Abdul Taib Mahmud madahka Larry agi diguna laban kabinet agi begunaka ‘nembiak Cina’.

“Iya agi ba kabinet baru tu. Kami agi begunaka iya. Tegal iya ke nadai begempung enggau sebarang parti (komponen BN) deka di putarka sebedau maya bepilih (besai nengeri) ila,” ku iya lebuh ka bejaku ba aum pengarang berita pasal tusun kabinet nengeri ka baru ditu, kemari.

Larry maya agi ba PRS suba, kala nyadi Ketuai Pemadah ba parti nya. Iya lalu bisi laya enggau Presiden PRS Dato Sri Dr James Masing ka ngujung seduai enda sepenemu.

Kelimpah ari nya mega, Masing lebuh ka ditanya pengarang berita senentang Larry ka diambi baru besereta enggau tusun kabinet baru nya, madahka Larry ukai ngambi ungkup kerusi PRS ba kabinet.

Ba kabinet nya, dua mua baru ari PRS ka bisi dipadu dalam tusun kabinet baru tu ia nya John Sikie Tayai enggau Mong Dagang. Seduai ia sama-sama dipadu megai pengawa nyadi Menteri Muda.

“Aku (PRS) diungkupka kerusi baka ke udah. Kediatu, iya (Larry) ukai raban sebarang parti lalu iya nadai ngambi slot (kuota kabinet) aku,” ku iya.

Lebuh ditanya enti Larry di asuh pulai baru ngagai PRS, Masing madah: “Enda ulih agi. Nadai kebuah…, aku enda peduli nama utai ka deka digaga iya.

“Pekara ke berat diatu iya nya Kepala Menteri udah meri pulai baru semua slot ngagai PRS.

“Diatu PRS bempu dua iku Menteri Muda lalu slot Sapit Spika Dewan Undangan Negeri agi bisi. Nya aja kedeka aku.

“Aku temegah hati lebuh Kepala Menteri meri awak ngagai Mong Dagang enggau John Sikie,” ku Masing.