Bisi tiga iku nadai agi dalam lis ubah baru Kabinet menua Sarawak nyengkaum Datuk Ambrose Blikau

KUCHING: Ubah Kabinet Nengeri ke dipadah Kepala Menteri Pehin Sri Abdul Taib Mahmud ditu kemari mantaika enam iku mua baru sereta tiga iku menteri muda ke nadai agi ba lis kabinet.Taja bisi ubah dalam lis menteri ia tang Kabinet Nengeri mega agi mengkang ngetanka 12 opis menteri baka ke udah.

Enam mua baru ka dibantai kemari iya nya Kaban Kunsil Nengeri (ADUN) Kalaka Datuk Abdul Wahab Aziz ari Parti Pesaka Bumiputera Bersatu (PBB), ADUN Jepak, mega ari PBB Datuk Talib Zulpilip, ADUN Kemena, Dr Stephen Rundi Utom (PBB), ADUN Tasik Biru Datuk Peter Nansian (Parti Demokratik Progresif Sarawak-SPDP), ADUN Kakus, John Sikie Tayai (Parti Rakyat Sarawak- PRS) enggau ADUN Bukit Begunan Mong Dagang (PRS).

Wahab dipaduka nyadi Menteri Muda Pemansang Menua Pesisir enggau Menteri Muda Pengawa Rumah enggau Pemansang Nengeri; Talib dipadu megai pengawa nyadi Menteri Muda Pengawa Dagang Temuai; Rundi dipaduka nyadi Menteri Muda Pengerai Mensia Mayuh enggau Menteri Muda Perengka Guna Mensia Mayuh; Nansian dipadu nyadi Menteri Muda Rampa Menua; Sikie megai pengawa nyadi Menteri Muda ba Opis Kepala Menteri enggau Menteri Muda Opis Kunsil Pelilih Menua Pesisir; sereta Mong dipaduka megai pengawa nyadi Menteri Muda Pengawa Dagang Temuai enggau Menteri Muda Betanam Betupi (Pansik enggau Atur).

Tiga iku menteri muda ke nadai agi ba lis kabinet iya nya, Datuk Bolhassan Di (PBB) ke kala megai pengawa Menteri Muda ba Opis Kepala Menteri (Teknologi Pemadah) enggau Menteri Muda Pemansang Infrastruktur enggau Komunikasi.

Dua iku agi menteri muda ke nadai agi ba lis kabinet, Datuk Hamden Ahmad (PBB) ke kala megai pengawa nyadi Menteri Muda Nembiak enggau Menteri Muda Pengawa Dagang Temuai sereta Datuk Ambrose Blikau Enturan (PBB) ke kala nyadi Menteri Muda Pemansang Menua Pesisir enggau Menteri Muda Perengka Guna Mensia Mayuh.

Kabinet nya mega agi mengkang ngetanka 12 opis menteri baka ke udah.

“Tusun kabinet baru tu deka belabuh ari 1 Disember tu ila. Ubah sekali tu nadai mantaika mayuh ubah tang manah agi di peda kena napi Sarawak nyendiaka diri nitih ka ubah baru, enggau bepilih menua sereta Langgur Malaysia ke-10 (RMK-10) tu ila,” ku iya.

Sama bisi datai ngulu aum pengarang berita pasal pengawa nya ka diatur ba Opis Kepala Menteri ba Wisma Bapa Malaysia ditu kemari, iya nya dua iku sapit iya, Datuk Patinggi Tan Sri Dr George Chan enggau Datuk Patinggi Tan Sri Alfred Jabu Numpang, Presiden SPDP Dato Sri William Mawan Ikom, Presiden PRS Dato Sri Dr James Masing, Sapit Presiden PBB Datuk Amar Abang Johari Tun Openg enggau Sekiteri Perintah Nengeri Sarawak, Datuk Amar Morshidi Ghani.

Kelimpah ari nya, Taib mega madahka ubah sereta atur ti baru tu di peda manah agi nitihka ubah enggau peminta kemaya hari tu.

Entara pekara bukai, Dr Chan diberi tanggung pengawa betuaika Opis Menteri Pengawa Dagang Temuai enggau Pesaka Tuai. Dato Sri Michael Manyin Jawong megai pengawa nyadi Menteri Pemansang Infrastruktur enggau Komunikasi sereta Abang Johari megai pengawa nyadi Menteri Pengawa Rumah enggau Pemansang Nengeri.

Sebedau tu, Opis Menteri Pengawa Dagang Temuai digempung begulai enggau Pemansang Nengeri ti betuaika Manyin lalu lebuh iya di seraraka ari Opis Menteri Pengawa Dagang Temuai, Pemansang Nengeri digempung begulai enggau Opis Menteri Pengawa Rumah.

Ba kabinet baru tu, Manyin dipadu megai pengawa Opis Menteri Pemansang Infrastruktur enggau Komunikasi ke sebedau tu di pegai Jabu.

Kelimpah ari nya mega Datin Fatimah Abdullah ditambah tanggung pengawa, iya nya nyadi Menteri Muda Pemansang Sosial enggau Urbanisasi (Pemansang Raban Indu). Sebedau tu, iya megai pengawa nyadi Menteri Muda ba Opis Kepala Menteri (Pengerembai Mudal Mensia enggau Latih) enggau megai pengawa Menteri Muda Ngemuden Betanam Betupi (Ekonomi Ruang Bilik enggau Latih).

Bekait enggau pekara tu, Taib ti mega Presiden PBB lebuh ka bejaku ngagai pengarang berita, madahka mua baru ke bisi di bantai ba tusun kabinet baru tu mandang ka sida ti dipilih tu sida ka ‘versatile’ lalu dipelaba manah sereta ulih nitihka peneleba siku-siku.

Iya mega madah, tiga iku menteri muda ke nadai agi megai pengawa sida iya ba lis kabinet dikemedar ka ngeleka pengawa iya ba ujung bulan tu ila.

Bolhassan enggau Hamden ku iya, sigi udah madahka diri enggai agi megai pengawa menteri muda. Ku iya, Hamden bisi madahka diri enda ulih agi megai pengawa iya ketegal enda entu bepengerai sereta Bolhassan ke lama udah madah diri empu deka ngelengka pengawa iya.

Lebuh ditanya ngagai Taib baru, pasal mua baru ari raban ADUN indu, iya madah ka: “Ba penggal keterubah (DUN) awakka ke sida iya (ADUN) bepeneleba enggau mayuh macham pekara ba pengawa perintah tauka belajar nyaut tanya ba aum Dewan lebuh nyadi menteri ila.

“Kami mega irau enti sida iya kelalu mayuh tanggung pengawa nyadi menteri enggai ke sitak ti di wakil sida iya enda entu ulih diintu.”

Ba tanya siti agi nama kebuah nadai mua baru ari ADUN Parti Rakyat Bersatu Sarawak (SUPP), iya madahka enda semua ADUN deka dipadu nyadi menteri tauka menteri muda.