KUCHING: Rampang minyak sawit udah diberi kelala nyadi siti ari penatai ke besai ngaga kuasa ke tau kena baru ke ulih dikemansangka di Malaysia, ku Menteri Kuasa, Teknologi Gadung enggau Ai Datuk Seri Peter Chin.Iya madah biomass enggau biogas ari industri sawit nyadi siti ari industri ke patut diangkatka baruh ‘Renewable Energy Action Plan’ begulai enggau tekad mikro hidro enggau rampang utai kilang.

Iya madah tu ulih ngurangka bepanggai ba produk petroleum enggau ngena mayuh agi minyak bukai.

“Nitihka Palan Kuasa Malaysia, bisi 2,000 megawat karan ulih dikeluar ngena biomass enggau biogas aja,” ku iya ma teks jaku iya ke dibacha Sapit Seketeri Jeneral opis menteri nya, Datuk Nor Azmal Mohd Nasir ba atur pengawa bejadi Konferens Minggu Kuasa Entarabansa 2009 (KMKE 2009) ba Borneo Convention Centre Kuching (BCCK) ensanus.

Chin madah Malaysia deka meri mayuh agi fokus ba kuasa hidro kena ngulihka karan.

“Tekad Ai Bakun dipelaba tembu 2011 lalu ulih ngeluarka 1,700MW karan tetap ke deka dianjung nengah kabel baruh tasik ngagai semenanjung ba taun 2015,” ku iya.

“Sida patut beratika pengawa ngeluarka produk enggau servis ke enda masau kuasa enggau ai, lalu bejalaika teknologi gadung sereta nyual produk komersil ke ulih kena ba menua tu,” ku iya.