KUCHING: Pengarah Urusan Sarawak Forestry Corporation (SFC), Datu Len Talif Salleh, kemari madah ngagai media, siku pegawai SFC ke mansik pengawa orang nebang kayu dibukut ba mua maya iya ngetan dua iku lelaki ke benung munggah kayu ngagai luri ke dipelaba tebang nadai ngena permit.Iya madah, insiden nyadi dua hari tu ke udah ba siti endur di Betong lebuh pegawai opis nya bejalaika pansik pengawa nebang kayu enda beradat.

Taja pia, Len Talif enggai nyebut pasal insiden nya laban ku iya kes nya agi ditasat polis.

“Bisi dalam dua hari tu udah, siku pegawai kami kena bukut ba mua benung bejalaika pansik nagang pengawa nebang kayu enda beradat.Diatu kes nya nyadi kes polis. Ila baru kitai sama nemu pasal kes tu nganti polis udah abis nasat kes tu enggau silik,” ku iya madah maya aum media ditu, kemari.

Sebedau nya, Len Talif bisi bejaku ba ‘Regional Symposium on Orang Utan Conservation’ ke ngena rambai jaku ‘Orangutan Survival: Strategizing for Human and Orang utan Needs’ ti dibuka Menteri Langgur Penemu Kedua enggau Pengintu Pemisi, Datuk Amar Awang Tengah Ali Hasan ke ngarika Kepala Menteri Pehin Sri Abdul Taib Mahmud.

Len Talif ti mega pengarah Opis Kampung Sarawak (JHS) madah lebuh bejalaika pengawa nya opis sida iya suah betunga enggau gaya ke nadai pengelikun tang iya enda nagang opis nya bejalaika pengawa sida.

“Kami enggau naka ulih bejalaika pansik kami sereta neritka undang-undang nitihka kuasa kami. Pengawa pansik begunaka kerejasama enggau polis, Agensi Penguatkuasaan Maritim Malaysia (APMM) sereta sedadu.

“Lebuh ngereja pansik baka tu, pegawai kami ari JHS tauka SFC ukai bebaika senjata, nya kebuah tiap kali kami bejalaika pansik kami mai polis enggau sedadu,” ku iya.

Bejaku pasal pengawa nagang orang ngasu mayas, ku Len, opis JHS enggau SFC bejalaika kuasa sida enggau terit kelebih agi beratika pengawa sekeda orang ngasu jelu mayas ba sitak ke dilindung perintah ulih tagang enggau mujur.