SIBU: Siku polis bepangkat Sap Inspektor ari Daro enggau siku kaban iya ke gawa nyadi sedadu ba siti kem sedadu ditu sama ditangkap sepengudah ai kemi seduai sama ditemu positif dadah malam hari Minggu tu tadi.Saspek dua iku umur kandang 30 taun ditangkap ba siti operasi ngenyit ulih seraban polis narkotik ba siti palan beperindang di Jalai Lanang, ditu.

Polis nya munyi ke berasal ari Semenanjung Malaysia lalu agi mengkang ditan ditu laban kena mantu tasat ti silik agi.

Serimbai enggau tu, Ketuai Polis Daro, Ketuai Inspektor Ismail Sidek  lebuh ditanya kemari madah amat bisi kes nya.

Taja pia, iya enggai bejuraika pekara nya lebih silik, iya nya bakani ku seduai nya ditangkap dalam operasi nya.

Dalam siti kes bukai, siku mandur ba palan alai ngaga rumah ditu ke berasal ari Johor, bakal ba pala sereta sebelah tubuh udah bekau iya kena jamah seraban bala lelaki ba siti insiden belaya apin lama.

Insiden nya dipeleba nyadi urung pukul 7.30 malam ba siti kedai kupi di  Sibu Jaya .

Nyadi sebedau insiden nya, mandur nya, umur 31 taun,  enggau bala raban lelaki nya munyi ke bisi utai enda dipetalat.

Tang taja pia, pun kebendar sida nya belaya, apin tentu ditetapka.

Tudah tuai nya munyi ke dijamah orang ngena jari sereta enggau papung kayu ke lalu ngujungka tudah tuai enda ulih enda ditaban berubat ke Sepital Sibu.

Nyadi ka tambah nya, bala sida polis ke nerima ripot pasal orang belaya nya lalu berumbah nguang ngagai alai nya lalu nangkap enam iku bala saspek kena mantu tasat.

Bala sida saspek ke ditangkap nya umur 14 ngagai 42 taun.