KUCHING: Bala sida semilan iku nembiak bansa Penan ke belajar ba Kolej SEGi ditu nya sebagi ari bala nembiak ke diberi insentif pelajar ulih Sarakup Indu Dayak Sarawak (SIDS).

Semua bala sida indu nya ke belajar ngambi ‘Diploma in Nursing’ nerima insentif nya ari Ketuai SIDS Senator Dato Sri Empiang Jabu.

Ba pengerami nya kemari, Empiang, ke dulu suba nyadi pengajar kanan, mega nyua insentif ngagai enam iku bala sida ke nyulut dalam peresa UPSR, tiga belas nembiak PMR, lima nembiak SPM enggau tiga ke ngambi STPM dalam taun 2008 tu tadi.

Empiang madah, atur meri insentif nya endang siti ari kemeran SIDS kena meransang tulang belajar ka bala nembiak Dayak laban nemu pemesai reti pelajar nya ba pengidup sida siku-siku.

“Taja pan penyampau insentif (mata duit) tu nadai mayuh, tang tu endang siti ari jalai kena kami meri peransang ngagai bala nembiak kitai awakka sida nyulut dalam pelajar sida, lalu serimbai enggau nya kena meri kelala enggau pengaga ati ngagai pengeran sereta komitmen bala apai indai sida ti negika pemesai reti pelajar sekula dalam pengidup anak sida,” ku Empiang.

Iya ngansak bala apai indai awakka terus meri peransang enggau iring ti menyana ngagai bala anak sida lalu nadai nyeliah diri ari tanggung pengawa sida ngajar bala anak ngemeranka ulah ti manah sereta nyadi rayat Malaysia ti menyana sereta meruan pendiau.

Bala apai indai, ku iya, patut nadai ngetu meri insentif ngagai anak sida, ukai enda tau enda ngena duit tang mega ngena jalai peransang bukai awakka sida enda mantul dalam pelajar sida.

Nadai utai bukai beguna agi ari pelajar sekula, ku iya, ka tambah mega ulah ti manah enggau pengeran dalam pengawa kena sida ulih mujur nyatup chabar dunya global tu.

“Selambar keretas degree nya enda chukup kena orang siku-siku betangkup nyatup chabar dudi hari ila, nya alai besai bendar reti genap iku nembiak nya disikapka enggau ulah sereta budi ti manah awakka sida nyadi rayat Malaysia ti menyana, meruan pendiau sereta bepenyiru,” ku Empiang madah.

Iya mega ngelalau bala nembiak awakka bisi pengarap ka diri empu sereta anang limpang ari atur enggau adat sekula lalu pia mega anang enda ngasika jaku bala apai indai maya ke di rumah.

Empiang madah SIDS deka terus bejalaika tanggung pengawa sida mantu bala nembiak sekula raban bansa Dayak ngena jalai meri sida insentif ambika kena meransang tulang sida nyulut dalam pelajar.

Serimbai nya, Empiang minta mayuh agi bala indu Iban enggau masuk nyadi kaban SIDS awakka sida terus maju sereta mansang.

“Enda ngira bala orang profesional, graduat tauka bini orang ke ngintu ruang bilik aja, aku enggau ati ti gaga sereta lantang minta kita sama enggau masuk nyadi kaban SIDS,” ku iya.

Dulu ari tu chermin duit turu pelajar sekula SIDS Datin Catherine Gramong madah, bisi 285 iku bala nembiak Dayak udah diberi insentif kenyau ari taun 2000 suba.

Ari penyampau nya, 109 nya nembiak lelaki enggau 176 nya indu. Semua sida tu udah disua penyampau RM42,000 dipegulai.

Pengerami nya kemari mega nyengkaum siti atur seminar pelajar sekula pasal adap tuju pengidup nembiak enti udah tembu ngambi peresa SPM enggau STPM sereta enggau bantu belanja ke dibantai ulih Ngelambong Chin enggau tip kena nyendiaka diri nangkup peresa ulih Mitty Chai.