Kimpin bejalaika pengawa ngeletak tanda rega belabuh 27 Julai ngagai 31 Ogos tu, ku ketuai KPDNKK

KUCHING: Orang dagang ke nadai ngeletak tanda rega barang belabuh 1 September 2009 deka diukum Opis Menteri Dagang Dalam Menua, Pengguna enggau Koperasi (KPDNKK).

Tuai opis nya Ahmad Nasir Khosri madah, atur nya deka diambi udah kimpin nanda rega dipejalai KPDNKK ke belabuh ari 27 Julai ngagai 31 Ogos tu.

“Udah kimpin nya abis, kami deka nganjung pegawai kami mansik tiap iti kedai lalu enti bisi penyalah digaga sida tu kami deka ngukum sida,” ku iya madah ngagai pengarang berita udah bejadika kimpin Nanda Rega 2009 ba Pasar Awam Stutong ditu.

Iya madah orang dagang ke ngaga penyalah tu tau kena ukum nitihka Genteran Tusun Ukum Akta Kawalan Harga 1946 lalu enti ditemu salah, tau kena ukum RM15,000 tauka dua taun kena jil tauka kedua iti nya sekali.

Bejaku pasal kimpin nanda rega, Nasir madah iya netuju kena mantu orang dagang enggau pengguna.

“Ba sepiak orang dagang, iya dikarap ulih ngereja pengawa ke enda belalai ba pengawa ngeletak tanda rega sereta mandangka rega tunai ngagai pembeli.

“Kelimpah ari nya, ba sepiak pembeli kami ngarap iya meri peluang ke sama imbang ngagai sida kelebih agi ba pengawa mandingka rega, ngaga atur belanja sereta bedagang,” ku iya madah lalu nambah baru, Pasar Awam Stutong nyadi alai keterubah kena kimpin tu.

Kimpin tu ila deka dikerembai ngagai tiap pampang tauka sitak ba menua tu.

Nasir madah, kimpin nanda rega nya deka bejalaika pengawa iya ba pasar basah, kedai alai bejual barang, kedai alai bejual pemakai sereta ai irup, resturan enggau sekeda kedai makai bukai.

Iya madah, asil ari pansik opis sida iya ba kedai di serata bandar Kuching sebedau tu, tetemuka enda semua orang dagang ba nengeri tu nitihka atur ngeletak tanda rega.

“Tu nyadi laban ukai ketegal orang dagang enda nemu pasal ngeletak tanda rega tang bisi maya sida iya enda ingat,” ku Nasir.

Sama bisi datai ba pengawa nya, Kepala Seksyen Penguatkuasa KPDNKK Mohd Rahim Ibrahim enggau sekeda orang gawa bukai.