Apai indai dipinta jampat ngaga surat pengada ti besai guna ungkup anak sida

SIBU: Bala apai indai dipinta anang chengih-chengih ngapa, lalu enda beratka isu surat pengada bala anak sida, laban enggaika sida betapi enggau penanggul besai dudi hari ila.

Kaban Kunsil Nengeri Tamin Joseph Mauh Ikeh madah, mayuh bendar penanggul deka nuntung sida enti anak sida nadai surat pengada, nyengkaum pengawa ngerejista anak sida masuk sekula ila.

“Ngagai diatu, munyi ke didinga aku, bisi urung 600 ngagai 700 iku bala rayat mayuh (orang besai tuai) ba kandang menua Siong, Mukah enggau Selangau agi apin bisi surat pengada.

“Ari rita ke ditemu aku, mayuh penanggul nya nyadi ba sida laban sida meri pemadah pasal diri empu ti salah sereta enda nyentuk, enda silik dalam atur ngisi data ngena ngulihka surat pengada,” ku iya nerang.

Mauh mega ngarapka sida ke lalu apin bisi surat pengada nya meri pemadah ti silik kena nentuka proses ngaga surat beranak nya bejalai enggau manah sereta nadai penekul.

“Pekara tu besai bendar reti, laban surat pengada nya pekara lumur satu mesti bisi dikembuan genap iku rayat Malaysia kena nyeliahka diri ari sebarang penanggul tegal temu nadai ngembuan surat pengada,” ku iya keran madah.

Mauh mansutka jaku nya ba Pengerami Tuai Segulai Sejalai enggau Rayat ke diatur Opis Pekara Nyemetak (JASA) Sarawak Sitak Sibu/Mukah ti bejalai ba Rh Umbar Aping, Siong Tengah ditu kemari.

Dulu ari tu, Mauh mega bisi bejadika projek jalai kampung Rh Umbar Aping enggau projek jembatan Rh Ringgit Unchu, Siong Tengah ditu.

Kelimpah nya, Mauh mega ngarapka kerejasama tuai rumah ba sitak Kunsil Nengeri iya, ngambika sida meri data pemadah ti silik pasal bala nembiak redak ke diau nguan rumah panjai baruh pegai sida iya.

“Atur ngumpul data pemadah rayat rumah panjai tu besai endar guna kena kami ke nyadi pengari rayat ngatur pelin pemansang ba kandang parlimen enggau ba kandang kunsil nengeri (DUN) siku-siku,” ku iya nerang.

Mauh mega ngarapka bala rayat ari menua ulu ulih meri pengarap penuh sereta sukung ti kuat ngagai perintah Barisan Nasional (BN) kena nentuka sida nadai ngetu ensepi lebih penguntung ari pemansang sosial enggau ekonomi.

“Mina perintah BN aja ke ulih ngenataika sekeda ubah ti manah tu ngena pejalai sekeda projek ba menua siti-siti ke endang ditagaka kena ngemai sekeda projek pemansang ka penguntung rayat,” ku iya keran madah.

Serimbai enggau pengerami nya, Mauh mega bisi ngenataika geran projek menua pesisir (MRP) penyampau ungkup kena bala sida ba Komiti Pengelikun enggau Pemansang Genturung Pendiau (JKKK) Rh Umbar enggau RM 1,500 ungkup Biro Indu JKKK Rh Umbar.

Sama bisi datai ba pengerami nya Chermin Opis Kunsil Pelilih Pesisir Sibu (MDLBS) Kaunselor James Laju, wakil DO Sibu Suzana Indit, DO Selangau Wan Akil Wan Ahmad Bujang enggau pengari Ketuai Opis Jasa Sitak Sibu, ketuai JASA sitak Sibu /Mukah Elisa Jaboh.