Gerempung Pengajar Sarawak madah atur nya ukai ukum ti patut

KUCHING: Gerempung Pengajar Sarawak (STU) madah pemutus atur disiplin nyengkaum enda nikika pangkat kepala pengajar tauka pengetua ti ditemu enda terit enggau status pengerai nembiak sekula besangkut paut enggau penyakit renga babi nya siti atur ti kelalu renjan.

Presiden gerempung nya William Ghani Bina madah kepala pengajar tauka pengetua ukai lutur tauka pakar pengerai ke bisi pengelandik ngelala status pengerai pengajar tauka nembiak sekula.

“Kepala pengajar, pengetua tauka pengemata sesi lemai ukai lutur tauka pakar ke ulih ngereja pengawa baka nya.

“Enti ngelalau meri jaku nyangka nya praktikal agi. Atur disiplin nya nyengkaum enda nikika pangkat sida tiga bengkah pemesai tu ketegal pengelalek sida iya, nya ukum ti kelalu renjan,sereta enda patut,” ku iya madah maya ditalipaun kemari.

Ghani ti mega chermin Kongres Gerempung Pekereja Opis Perintah tauka Kesatuan Pekerja Perkhidmatan Awam (CUEPAC) menua madahka atur baka nya semina deka ngenusahka kepala pengajar, pengetua tauka pengemata sesi lemai ke mega udah megai mayuh pengawa bukai.

“Enti kepala pengajar tauka pengetua nemu bisi kes (Influenza A H1N1) ba sekula tang nadai ngeripot tauka sekula nya enda ditutup, sigi patut kena tinggang ukum sida iya. Tang ukai ketegal enda mujur ngelala status pengerai pengajar tauka nembiak,” ku iya madah.

“Enti lalek reti nya sengaja neju tauka enggai ibuhka gaya pengerai pengajar tauka nembiak sekula tang aku madah ditu enti deka beratika status pengerai, nya ukai pengawa kepala pengajar tauka pengetua,” ku iya.

Iya mega nanya ulah sekeda orang ke jampat besalahka sekula, kepala pengajar tauka pengetua lebuh ngereja penyalah ke mit tang pemujur sida iya ngiring mai pemujur ngagai sekeda sekula jarang disebut sida iya.

“Nya enda betul nama iya,” ku iya.

Taja pia, Ghani madah chara nya siti chara ke manah kena nyeliahka penyakit nya ari berampit enggau serius agi ba menua tu semina chara ngemutarka nya meri atur ngagai sekula utai ke enda patut.

Iya madah baru, penyakit nya ke berampit nyadi ukai semina ba sekula tang tau sebarang alai.

Nya alai, iya madahka nyangka bisi jalai bukai ke manah agi ke ulih diambi kira laban atur baka nya semina ngenusahka kepala pengajar tauka pengetua ke tau ngachau batang pengawa sida iya.

“Semua kepala pengajar tauka pengetua patut meri jaku tangkan ngagai nembiak sekula ngasuh sida iya ngintu pemeresi lalu ngasuh bala pengajar tauka nembiak sekula ke ditemu sakit betemu enggau lutur enggau naka pengelengkas,” ku iya ngujungka jaku, kemari.

Hari Empat tu tadi, Bernama bisi ngeripot Sapit Menteri Pelajar Dato’ Wee Ka Tiong madahka kepala pengajar tauka pengetua ti ditemu enda ngelala status pengerai pengajar sereta nembiak berindik ari penyakit H1N1 ke berampit tu, deka diukum disiplin nyengkaum enda nikika pangkat sida iya.