Kelas nyungkit DAM kena ngerembai sereta promosi tenun nyadi produk komersil

MIRI: Pengelandik nyungkit, iya nya siti pampang tenun jarang bendar dikembuan bala nembiak rebak baru indu Iban kemaya haritu.

Ukai semina nyungkit, tang pengelandik semua pampang tenun bukai pan sigi jarang dikembuan indu Iban rebak baru diatu.

Nyadi enti iya bakanya, penemu enggau pengelandik ti dikena bala aki ini kitai kelia nenun pua kumbu, kain enggau utai bukai deka nyadi punas.

Laban nangika kelaie pesaka enggau penemu tuai bansa diri ti berega nya lenyau, lesap pia aja, Gerempung Dayak Miri (DAM) udah ngambi inisiatif ngatur Kelas Tenun (Nyungkit) 2009 ba Ruai Francis Loke, Rumah Dayak ti bejalai pengelama enam minggu.

Ketuai raban indu DAM, Julia Jugak madah, kelas tu diatur kena hari Satu ngagai Lima berengkah ari jam pukul 8 pagi ngagai 4 lemai baruh kemata enggau ajar siku pengajar ti chukup teleba, iya nya Roslind Sudau.

Bisi 10 iku nembiak udah ngerejista diri ungkup sesi sekalitu ke berengkah ari 1 Julai ngagai 14 Ogos.

“Kami tagit 16 iku tang ngagai diatu bisi 10 iku udah diterima masuk. Kami agi nerima sida ke deka enggau dalam kandang seminggu tu,” ku iya lebuh ditanya Utusan Borneo kemari.

Serimbai enggau tu, Presiden DAM Alexander Isut madah, atur muka kelas tenu tu ngayanka pemendar enggau pengeran ati gerempung nya deka ngerembaika penemu enggau adat asal tu ba bala nembiak rebak baru diatu.

“Kitai ngarapka atur tu ngerembai sereta ngasuh mansang agi pengerindu enggau penemu bala nembiak baru bansa Dayak diatu belajarka penemu enggau pengelandik pesaka tuai asal bansa diri awakka iya terus dintu, dikerembai sereta dikemeranka.

“Serentak enggau nya, atur tu mega dikarapka sama begembar ngangkat sereta nyungkak manah agi tikas pemanah bunga enggau asil tenun nyungkit lalu ngichaka iya ulih ngebus ngagai makit menua tu empu tauka makit entarabansa,” ku iya lebuh ke bejadika Kelas Tenun Sungkit 2009 ba Rumah Dayak ditu, kemari.

Ku Isut madah, tebal agi bala nembiak Iban ke nadai penemu tauka pengelandik tenun sungkit tang enggau atur kelas tu, DAM besai bendar pengarap ulih ngasilka pakar, iya nya orang ke dikelandik nemu betenun, nemu nyungkit dudi ila.

Ku iya madah, pengawa betenun nyungkit nya ukai semina kena nambah koleksi tang mega ulih dikomersilka, kena ngiga belanja lebih ungkup bala diri sebilik.

“Nya alai aku endang keran meransang bala raban indu, kelebih agi bala bini orang, ngambika sida sama enggau nguji dalam pengawa tu enggau naka ulih sereta penuh komitmen.

“Enti ngena chara iya, produk tu ulih ngumpan ati bala dagang temuai. Nya alai aku minta semua bala kita ke enggau kelas tu ngiga awak enggau jalai kena promosi asil tenun sida dudi hari ila,” ku iya sereta ngarapka pengerindu enggau pengawa sida enda ngetu tengan jalai aja.

Ngenang pasal pengelama kelas enam minggu nya, Isut madah kandang timpuh pengelama nya ulih ditambahka panjai agi enti bisi peminta iya digaga bakanya.

Iya ngarapka bala sida ke enggau masuk dalam kelas nya bulih penguntung ari awak enggau jam ke diberi ngagai sida kena ngulihka peneleba enggau penemu enggau naka mayuh ila.

Gerempung tu dulu ari tu, kala ngatur Kelas Tenun (Ngebat) dalam 2007 ditangkan enggau Kelas Tenun (Ngarap) taun dulu tu tadi. Kelimpah nya, sida mega bisi bejalaika kelas Ngajat, tebah bebendai enggau setawak sereta ngajar nganyam tikai.

Nyadi Rosalind Sudau, 55, madah, bebanding enggau tenun Pua Kumbu, tenun nyungkit jauh mudah agi dipejalaika.

“Tang taja pia, iya tetap begunaka pengeliat ati kena nentuka kain sungkit nya manah dipeda sereta likun,” ku iya ke madah diri udah nguji enggau orang betenum kenyau ari 30 taun tu ke udah.

Laban endang bisi pengerindu chukup dalam ba pengawa ngagai kain tenun, nya alai iya nadai kakang nerima peminta DAM nyadi pengajar ngelatih rebak baru diatu.

“Aku ngarapka ulih ngiri lalu magi penemuke bisi ba aku ngambika aris pesaka enggau penemu tuai tu enda punas ditelan pemansang baru diatu. Serentak enggau nya, iya mega ngerembaika agi pengerindu betenun ba raban bansa ukai Dayak ngambika sida keran agi belajar jalai enggau teknik betetun (nyungkit) dudi ila,” ku iya ke endang semampai ngereja tenun di rumah.