MIRI: “Taja pan kala digelar ‘YB bula’ ulih sekeda rayat ditu, utai nya nadai sekali-kali matahka pengeran enggau peransang iya gawa bebendar ke penguntung enggau pemansang rayat, laban kitai sama ulih meda gaya pemayuh pengawa enggau projek pemansang ti udah dikenataika ngagai kandang menua Lambir kediatu,” ku Kaban Parlimen Sibuti, Ahmad Lai Bujang.

Jaku nya sempalai kenang enggau puji MP pasal pemagas enggau pemanah pengawa (Kaban KN Lambir) Aidan Wing, iya nya siku pengari rayat ke ditemu nadai mantul dalam pengawa, chukup puoh enggau komited, lalu nadai kala bedulika kutuk enggau bantah sekeda orang ke semina ngiga penyalah, ukai pemanah orang.

Ku MP nya, enti bebanding enggau dulu suba, iya nya maya iya (Aidan) dipilih nyadi pengari rayat ba sitak bepilih Lambir, menua Lambir tu enda agi bala surut, agi mayuh pengurang baka ari sukut segi infrastruktur.

“Maya Aidan terubah iya nyadi pengari rayat ditu suba, sitak bepilih Lambir ke maya nya mungkur kandang menua Bekenu enggau Niah agi apin bisi jalai alun, apin bisi bekal ai paip sereta nadai mega bekal karan,” ku iya sereta madah iya empu kasih bendar meda Aidan semampai dikutuk lalu kala digelar YB bula.

Diatu ku Ahmad Lai, peda meh pemayuh pemansang ti udah nyadi ba menua Lambir, laban semua utai tau dikumbai bisi magang, berengkah ari jalai kampung ngagai jalai alun nisi tebing tasik sereta enggau bekal karan.

“Enti kitai deka ngumpul pemayuh tikit bilun iya (Aidan) ke semampai kulu-kuli nemuai ngagai rayat ba kandang menua iya ditu, engka bisi tiga guni, lalu nya meh tanda iya endang sigi pengari rayat ke rajin, puoh sereta beduli lalu kasihka rayat, ka tambah ka komited dalam pengawa ngemansangka kandang menua Lambir ka penguntung enggau penyenang rayat mayuh,” ku MP nya enggau temegah ati.

Ahmad Lai mansutka jaku nya ba pengerami Ketuai Segulai Sejalai enggau Rayat ti diatur Opis Pekara Nyemetak (JASA) Sarawak ba Rumah Johnson Janggu, Seloi Tengah, apin lama ke udah.

Sama bisi enggau ba pengerami nya Aidan empu, DO Miri Boniface Intang Apat, ketuai JASA Lukanisman Awang Saudi enggau Tuai Rumah Johnson Janggu.

“Tu meh chuan enggau teladan pengari rayat ke patut dipilih ngarika kitai. Kebendar, aku empu mayuh bendar belajar ari Aidan, bakani ku nyadi pengari rayat ke manah sereta meruan,” ku iya.

Serimbai enggau nya, enti bala rayat bisi sebarang penanggul, sida patut berandau pasal utai nya enggau pengari rayat sida empu, laban sida nya meh nyadi pending enggau mata perintah.

“Kami meh pengari rayat semua bala kita, nya alai enti nyema bisi penanggul, datai meh madah sereta berandau enggau kami, awakka kami ulih ngenataika kempelin kita nya ngagai perintah,” ku iya.

Nya alai iya ngarapka rayat mega patut mereti pasal semua projek pemansang ke dipinta sida nya ukai ulih dikemendar tauka dipejalaika sekesap mata aja tang enda ulih enda berenggat-renggat sereta ngena idar lalu enda ulih enda begunak kandang timpuh lama.

Nyadi Aidan dalam jaku iya, madah diri meri besai terima kasih ngagai JASA laban udah mujur ngatur program bakanya kena meri awak ngagai rayat enggau pengari sida sama betemu lalubetunga mua, begulai duduk lalu berandau pasal sekeda penanggul pemansang ba kandang menua diri empu.